استانادا ۆاكسينا سالاتىن پۋنكتىلەر ءتۇن جارىمىنا دەيىن جۇمىس ىستەيدى

نۇر-سۇلتان. قازاقپارات - نۇر-سۇلتان قالاسىنىڭ اكىمى التاي كولگىنوۆ ونلاين رەجيمدە مەديتسينا مەكەمەلەرىنىڭ باس دارىگەرلەرىمەن كەزدەسۋ وتكىزىپ، قازىرگى جاعدايدى تالقىلادى، دەپ حابارلايدى قازاقپارات.

«الەمدىك پاندەميا ادامداردى ەكى سەناريدىڭ الدىنا قويادى: ءبىرىنشىسى - ۆاكتسينا ەگىپ، ءوزىن جانە اينالاسىنداعىلاردى قورعاۋ، ەكىنشىسى - ىندەتكە شالدىعۋ. ەكىنشى نۇسقاعا كەلەتىن بولساق، ادام ءوزىنىڭ دەنساۋلىعىنا قاۋىپتى ءارى يممۋنيتەتتى السىرەتەتىن كوروناۆيرۋس ينفەكتسياسىن جەڭە الاتىنىن الدىن الا بىلە المايدى. جاعدايعا نەمقۇرايلىقپەن قاراپ، ۆاكسيناتسيانى ەلەمەي، اينالاداعى ادامدارعا ۆيرۋس جۇقتىرۋى مۇمكىن. ال بۇل ينفەكتسيانىڭ حاوتيكالىق تارالۋىنا مۇمكىندىك بەرەدى. مەديتسينا قىزمەتكەرلەرى ۆاكتسيناتسيانى 1- اقپاننان باستادى. ءبىرىنشى كەزەڭدە ەكپە ىندەتپەن كۇرەستە الدىڭعى شەپتە جۇرگەن مەديتسينا قىزمەتكەرلەرىنە، مۇعالىمدەرگە، ءتارتىپ ساقشىلارىنا جانە باسقالار ەگىلدى. 20 مىڭنان استام ادام قامتىلدى»، - دەپ جازدى شاھار باسشىسى Instagram پاراقشاسىندا.

ونىڭ ايتۋىنشا، ەكىنشى كەزەڭدە تۇرعىنداردى ۆاكتسينالاۋ قاراستىرىلعان. 6- ساۋىردە قالا تۇرعىندارى اراسىندا ەكپە الۋعا الدىن الا جازىلۋ باستالدى. بۇل ادامداردىڭ ءبىر مەزگىلدە جينالۋىن بولدىرماۋعا، ۆاكسينالاردى مەديتسينالىق مەكەمەلەرگە بىركەلكى تاراتۋعا مۇمكىندىك بەرەدى.

«ءبىرىنشى. تۇرعىنداردى جاپپاي ۆاكتسينالاۋ مەديتسينا قىزمەتكەرلەرىنەن كاسىبيلىكتى، جاۋاپكەرشىلىكتى تالاپ ەتەدى. دارىگەرلەرگە تاعى ءبىر مارتە نۇسقاۋ بەرىلدى. ولار ۆاكتسينانى ەكپەي تۇرىپ ناۋقاستىڭ دەنساۋلىعىن تەكسەرۋى كەرەك.

ەكىنشى. مەديتسينالىق مەكەمەلەرگە قوسىمشا جابدىقتار ورناتىلدى: 40-تان استام توڭازىتقىش قوندىرعىلارى، ۆاكتسينالاردى تاسىمالداۋعا ارنالعان 80 نەن استام تەرموكونتەينەر جانە باسقا. ەگۋ پۋنكتىلەرىنىڭ سانى 36 دان 100 گە دەيىن ءوستى. ۆاكتسيناتسيا پۋنكتەرىنىڭ جۇمىس ۋاقىتى ساعات 8:00 دەن 00:00 گە دەيىن ۇزارتىلدى.

ءۇشىنشى. «Mega Silk Way» سياقتى ءبىرقاتار س و و- دا ۆاكتسيناتسيا پۋنكتىن اشۋ ءۇشىن ينفراقۇرىلىم دايىنداپ جاتىرمىز. تىركەۋ، كۇتۋ، تەكسەرۋ جانە باسقا ايماقتار بولادى»، - دەيدى التاي كولگىنوۆ.

اكىمنىڭ سوزىنە قاراعاندا، مۇنداي ورىندار ادام كوپ جينالاتىن جەرلەردە جۇمىس ىستەيتىن ۇجىمداردى ۋاقىتىلى قامتۋعا مۇمكىندىك بەرەدى، وسىلايشا ولاردى قورعايدى. قاجەت بولعان جاعدايدا قالانىڭ قوناق ۇيلەرىندە دە ەگۋ پۋنكتەرى اشىلادى.

«تەك جاپپاي ۆاكتسيناتسيا ۇجىمدىق يممۋنيتەتتى قالىپتاستىرۋا، كوروناۆيرۋستىڭ تارالۋىن توقتاتۋعا كومەكتەسەدى» دەپ تۇيىندەدى ءسوزىن قالا باسشىسى.