قازاقستاندا دوكتورانتۋراعا قابىلداۋ ەلەكتروندىق فورماتتا بولادى
بۇل تۋرالى ءبىلىم جانە عىلىم مينيسترلىگىنىڭ Telegram-كانالىندا جاريالاندى، دەپ حابارلايدى قازاقپارات.
«جوعارى وقۋ ورنىنان كەيىنگى ءبىلىم بەرۋ باعدارلامالارىنا ءتۇسۋ ەرەجەلەرى وزگەرتىلدى. ەندى دوكتورانتۋراعا قابىلداۋ ەلەكتروندىق فورماتتا جۇزەگە اسىرىلادى. وتكەن جىلى بۇل ءتاسىل ماگيستراتۋراعا قابىلداۋ كەزىندە تيىمدىلىگىن كورسەتتى»، - دەلىنگەن مينيسترلىك مالىمەتىندە.
سونىمەن قاتار، پاندەمياعا بايلانىستى ستۋدەنتتەر مەن ماگيسترانتتارعا قورىتىندى جۇمىستارىن ونلاين فورماتتا قورعاۋعا رۇقسات ەتىلدى. ەگەر ديپلومدىق جۇمىس نەمەسە ماگيسترلىك ديسسەرتاتسيا ونلاين فورماتتا قورعالعان بولسا، ستۋدەنتتەردەن «ءمور» مەن «قولتاڭبا» تالاپ ەتۋدىڭ قاجەتى جوق.
«مۇنىمەن قوسا، ەندى بارلىق دوكتورلىق ديسسەرتاتسيا جەلىدە ترانسلياتسيالاۋ ارقىلى ونلاين- رەجيمدە قورعالاتىن بولادى. بۇل عىلىمي جۇمىستاردى قورعاۋ ءراسىمىنىڭ اشىقتىعى مەن ادىلدىگىن قامتاماسىز ەتەدى»، - دەپ اتالىپ وتكەن حابارلامادا.