رەسەيدە كوروناۆيرۋستىڭ ءۇشىنشى تولقىنى باستالۋى مۇمكىن
ەلدە ىندەت جۇقتىرۋ سانى ءتورت كۇن قاتارىنان ازايىپ جاتىر. ءبىراق ماماندار «تەز جۇعاتىن ۆيرۋستىڭ جاڭا شتامدارى تاراپ كەتۋى مۇمكىن» دەيدى. رەسەيدەگى ۆاكسينالاۋ ناۋقانى جايلى سول ەلدەگى ءتىلشىمىز باياندايدى.
دانا نۇرجان، ءتىلشى:
- رەسەيدە 6 ميلليون ادامعا ۆاكسينا سالىندى. 4 ميلليون 300 مىڭى ەكپەنىڭ ەكىنشى دوزاسىن العان. جۇرتتىڭ كوبىنە قوس كومپونەنتتى «سپۋتنيك V» ۆاكسيناسى سالىنىپ جاتىر. رەسەيدە شىعارىلعان «ەپيۆاككورونا» اتتى ەكىنشى پرەپارات دا اينالىمعا تۇسە باستادى. ونى دا ەكى رەت ەگۋ كەرەك. ءساۋىر ايىنىڭ سوڭىنا دەيىن بۇل ۆاكتسينانىڭ 1,5 ميلليون داناسىن شىعارۋ كوزدەلگەن. جالپى رەسەيدە ءۇش ۆاكتسينا تىركەلدى. اراسىنداعى «سپۋتنيكتىڭ» ەكى موديفيكاتسياسى بار.
الەكساندر ارۋتيۋنوۆ، ەۋرازيالىق تەراپيەۆتەر قاۋىمداستىعىنىڭ باس حاتشىسى:
- قازىر «سپۋتنيك لايت» دەپ اتالاتىن ۆاكتسينانىڭ جەڭىلدەتىلگەن ءتۇرى شىعادى. ونىڭ مىندەتى - ەلدەگى ىندەت تولقىنىن باسۋ. كەيىن تاعى ەكى ۆاكسينا دايىن بولادى. ولاردى قايتا ەگىپ، يممۋنيتەتتى ساقتاپ تۇرۋعا بولادى. ۆيرۋس مۋتاتسيالانسا، بۇل پرەپاراتتاردى موديفيكاتسيالاي الامىز. ۆاكتسينالار ءوندىرىس تەحنولوگياسى جانە ەكپە جاساۋ كەستەسى بويىنشا ەرەكشەلەنەدى. ناقتى قايسىسىن ەگۋ كەرەك ەكەنىن دارىگەرلەر شەشەدى.
گەننادي ونيشەنكو، ر ف مەملەكەتتىك دۋما دەپۋتاتى:
- ۆاكسينالاردى تاڭداۋعا بولمايدى. ەكپە ورتالىعىنا كەلگەندە دارىگەردىڭ ءوزى بەلگىلەيدى. بىزدە ۆاكتسينانىڭ ءۇش ءتۇرى بار، ولاردىڭ قاۋىپسىزدىگى مەن تيىمدىلىگى شامامەن بىردەي. ءبىر دەڭگەيدە تۇر. يممۋنيتەتىمىزدى ارتتىرۋىمىز كەرەك. حالىقتى وسى ىندەتتەن قورعاۋىمىز قاجەت. رەسەي بيلىگى جازدىڭ اياعىنا دەيىن ەلدە ۇجىمدىق يممۋنيتەت قالىپتاساتىنىنا ءۇمىتتى. وسى مەزگىلدە حالىقتىڭ %70 ىنە ەكپە سالىنۋى ءتيىس. سوندا عانا ىندەتكە بايلانىستى قابىلدانعان شەكتەۋلەر كۇشىن جويادى.