برازيليادا كەدەيلىك دەڭگەيى ءۇش ەسەگە ءوستى
قاراپايىم حالىق اراسىندا اشقۇرساق ادامدار كوبەيىپ، جۇمىسسىزدىق بەلەڭ الدى. ىندەتتىڭ ۋشىعۋىنا بايلانىستى كارانتين كۇشەيىپ، كوپتەگەن كاسىپورىندار قايتا جابىلدى. يتاليادا قارجى قىسپاعىندا قالعان شاعىن كاسىپ يەلەرى بيلىكتىڭ ساياساتىنا قارسى ەرەۋىلگە شىقتى. برازيليا مەن ارگەنتينادا دا كەدەيلىك دەڭگەيى ارتىپ بارادى. يتاليادا كوروناۆيرۋس پاندەمياسىنان زارداپ شەككەن شاعىن بيزنەس وكىلدەرى بيلىكتىڭ ىندەتپەن كۇرەستەگى ساياساتىنا قارسى شىعىپ، نارازىلىق اكسيا ۇيىمداستىردى. پارلامەنت عيماراتىنىڭ الدىنا جينالعاندار ءتارتىپ ساقشىلارىمەن قاقتىعىسقا ءتۇستى. 7 بەلسەندى قاماۋعا الىندى.
جەرگىلىكتى بيلىك ايماقتاعى ەپيداحۋالدىڭ ۋشىعۋىنا بايلانىستى كوپتەگەن كاسىپتى مامىر ايىنا دەيىن قايتا جاۋىپ تاستاماق. نارازىلار شەكتەۋ شارالارىنا كوڭىلدەرى تولمايتىنىن ايتىپ، كاسىبىن جالعاستىرۋعا مۇمكىندىك بەرۋدى تالاپ ەتىپ وتىر.
«مەملەكەتتىڭ وتەماقىسى كۇنكورىسكە جەتپەيدى»، - دەيدى بيزنەس وكىلدەرى.
گەرمەس فەرراري، مەيرامحانا يەسى:
- شەكتەۋلەرگە قاراماستان جۇمىسىمدى جالعاستىرا بەردىم. ەسەسىنە تولەيتىن ايىپپۇلدار كوبەيىپ كەتتى. ال جابىلاتىن بولساق ءتىپتى بانكروتقا ۇشايىن دەپ تۇرمىن.
ماۋريتسيو پينتو، دۇكەن يەسى:
- ەلدە توتەنشە جاعداي رەجيمى اياقتالعانشا العان بەتىمىزدەن قايتپايمىز. ىندەتتى جەڭۋ ءۇشىن كاسىپ يەلەرىمەن ارپالىسپاي، ناۋقاستاردى ەمدەۋ كەرەك. الدىمەن دەنساۋلىق ساقتاۋ سالاسىن جونگە كەلتىرسىن. ال ادامداردى ءناپاقاسىنان ايىرىپ، جۇمىسسىز قالدىرۋعا بولمايدى.
كوروناۆيرۋس ىندەتى برازيليالىقتاردىڭ دا ءال- اۋقاتىن السىرەتتى. بيىل ەلدەگى كەدەيلىك دەڭگەي 3 ەسەگە وسكەن. جىل باسىنداعى 3 ايدا جارلى- جاقىبايلار سانى 17 ميلليونعا جەتكەن. بۇل - جەرگىلىكتى حالىقتىڭ شامامەن %13 ءى. ولاردىڭ اي سايىن تاپقان تابىسى 44 دوللارعا دا جەتپەيدى. ساراپشىلاردىڭ ايتۋىنشا، كەدەي- كەپشىكتىڭ كوبەيۋىنە كوروناۆيرۋس ىندەتىنىڭ تىكەلەي اسەرى بار. بىلتىرعى جىلدىڭ ساۋىرىنەن جەلتوقسان ايىنا دەيىن 66 ميلليون تۇرعىن ۇكىمەتتەن جاردەماقى العان. ءبىراق سوڭعى ايدا اقشالاي كومەك قىسقارىپ قالدى.
مارسەلو نەري، زەرتتەۋ قورىنىڭ ديرەكتورى:
- قارجىلاي كومەك بەرۋ ماسەلەنى شەشپەسە دە، مۇنى ماڭىزدى قادام دەپ قاراستىرۋعا بولادى. كەدەيلىكتەن قۇتقارۋدىڭ تاعى ءبىر جولى - جاپپاي ۆاكسينالاۋ. ءبىراق ەكپە تولىق جەتكەنشە الەۋمەتتىك اراقاشىقتىق ساقتاۋ جانە ۇيدە وتىرۋ سياقتى تالاپتاردى قاتاڭ ۇستانعان ءجون.
رودريگو افونسو، «ازاماتتىق ءىس- ارەكەت» ۇيىمىنىڭ ديرەكتورى:
- نەگىزى ىندەت اشتىق اكەلمەيدى. بۇل جوقشىلىق ىندەتكە دەيىن بولعان. كوروناۆيرۋس تەك جاعدايدى ۋشىقتىرا ءتۇستى. جاپپاي جۇمىسسىزدىق جايلادى. كەدەيلىك پەن جۇمىسسىزدىق ارگەنتينادا دا بەلەڭ الدى. جۇرگىزىلگەن زەرتتەۋلەرگە ساي ايماقتاعى كەدەيلىك يندەكسى وتكەن جىلى %42- كە ارتقان. ال جالپى ىشكى ءونىم %9,9 كە قۇلدىرادى. بۇگىندە 45 ميلليون حالقى بار ەلدە شامامەن 19 ميلليون تۇرعىن كەدەيلىك شەبىندە كۇن كورەدى. قازىر ەكى قولعا ءبىر كۇرەك تابا الماي جۇرگەن ارگەنتينالىقتاردىڭ قاتارى ارتىپ بارادى. ءتۇرلى تاۋار قۇنىنىڭ شارىقتاۋى دا جاعدايدى ودان بەتەر قيىنداتىپ تۇر.