ءماجىلىس جەردى شەتەلدىكتەرگە بەرۋگە ءبىرجولا تىيىم سالۋدى كوزدەيتىن زاڭ جوباسىن ماقۇلدادى

نۇر-سۇلتان. قازاقپارات - پارلامەنت ءماجىلىسىنىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جەر قاتىناستارى ماسەلەلەرى بويىنشا وزگەرىستەر مەن تولىقتىرۋ ەنگىزۋ تۋرالى» زاڭ جوباسى ءبىرىنشى وقىلىمدا ماقۇلداندى، دەپ حابارلايدى قازاقپارات ءتىلشىسى.

«ەلىمىزدىڭ ەگەمەندىگىن نىعايتۋ جانە حالىقتىڭ ازىق- تۇلىك قاۋىپسىزدىگىن قامتاماسىز ەتۋ ماقساتىندا، قازاقستان ازاماتتارىنىڭ پىكىرىن ەسكەرە وتىرىپ، 2016 -جىلدىڭ 6-مامىرىندا قازاقستان رەسپۋبليكاسىنىڭ پرەزيدەنتى جارلىعىمەن اۋىل شارۋاشىلىعى جەرلەرىن شەتەلدىكتەرگە، ازاماتتىعى جوق ادامدارعا، شەتەلدىك كومپانيالارعا سونداي- اق، شەتەلدىك ۇلەسى بار قازاقستاندىق كومپانيالارعا جالعا بەرۋگە، بۇدان باسقا قازاقستاننىڭ ازاماتتارى مەن زاڭدى تۇلعالارىنا اۋىل شارۋاشىلىعى جەرلەرىنە جەكە مەنشىككە بەرۋگە قاتىستى موراتوري ەنگىزىلدى. موراتوري مەرزىمى 2021 -جىلدىڭ 31-جەلتوقسانىندا اياقتالاتىنىن ەسكەرە وتىرىپ، قازاقستان رەسپۋبليكاسىنىڭ پرەزيدەنتى قاسىم-جومارت كەمەل ۇلى توقايەۆ اعىمداعى جىلى 25-اقپانداعى ۇلتتىق قوعامدىق سەنىم كەڭەسىنىڭ بەسىنشى وتىرىسىندا جەر ماسەلەسى قاشاندا حالقىمىز ءۇشىن اسا ماڭىزدى ەكەندىگىن جاريالاي وتىرىپ، شەتەلدىكتەرگە جانە شەتەلدىك زاڭدى تۇلعالارعا اۋىل شارۋاشىلىعى جەرلەرىن ساتۋعا، جالعا بەرۋگە زاڭ جۇزىندە ءبىرجولا تىيىم سالۋدى تاپسىردى»، - دەدى اۋىل شارۋاشىلىعى ءمينيسترى ساپارحان وماروۆ.

وسىعان وراي، ءتيىستى زاڭ جوباسى ازىرلەنىپ اعىمداعى جىلى 15-ناۋرىزدا ماجىلىسكە ەنگىزىلدى. «بۇگىنگى تاڭدا ۇسىنىلعان زاڭ جوباسىمەن اۋىل شارۋاشىلىعى جەرلەرىن شەتەلدىكتەرگە جانە شەتەلدىك كومپانيالارعا، شەتەلدىك ۇلەسى بار قازاقستاندىق كومپانيالارعا، ازاماتتىعى جوق ادامدارعا، حالىقارالىق قاتىسۋى بار عىلىمي ورتالىقتارعا، سونداي-اق قانداستارعا بەرۋگە تولىق تىيىم سالۋ كوزدەلگەن. سونىمەن قاتار، زاڭ جوباسىندا بۇدان بۇرىن شەتەلدىكتەرمەن جانە شەتەلدىك ۇلەسى بار قازاقستاندىق كومپانيالارمەن جالعا الىنعان اۋىل شارۋاشىلىعى جەرلەرىنىڭ پايدالانۋ مەرزىمىن ۇزارتىلمايتىندىعى جانە ولاردىڭ پايدالانۋ مەرزىمى اياقتالعانعا دەيىن عانا يەلىكتە بولاتىنى قاراستىرىلعان»، - دەدى مينيستر.

ونىڭ ايتۋىنشا، قانداستار بويىنشا ولار جەكە قوسالقى شارۋشىلىعى، باۋ- باقشا جانە ساياجاي قۇرىلىسى ءۇشىن جەر ۋچاسكەسىن الا الادى، اۋىل شارۋاشىلىعى جەرلەرىن قازاقستان ازاماتتىعىن العاننان كەيىن عانا جالعا الۋعا مۇمكىندىگى بار. زاڭ جوباسىمەن جەر كودەكسى جانە ءۇش زاڭعا، ونىڭ ىشىندە، كوشى- قون زاڭىنا وزگەرىستەر ەنگىزىلىپ وتىر. ەسكە سالا كەتەيىك، بيىل ناۋرىز ايىندا پرەزيدەنت قاسىم- جومارت توقايەۆ جەردى شەتەلدىكتەرگە ساتۋعا ءبىرجولا تىيىم سالۋدى كوزدەيتىن زاڭ جوباسىن ماجىلىسكە جولداعانىن ايتقان ەدى.

«بۇگىن مەن ءوزىمنىڭ پرەزيدەنت رەتىندە زاڭ شىعارۋعا باستاماشىلىق ەتۋ قۇقىعىمدى پايدالانىپ، جەردى شەتەلدىكتەرگە ساتۋعا جانە جالعا بەرۋگە ءبىرجولا تىيىم سالۋدى كوزدەيتىن زاڭ جوباسىن ماجىلىسكە جولدادىم. پارلامەنت ونى بەلگىلەنگەن رەگلامەنتكە سايكەس قاراستىرىپ، ءتيىستى شەشىم قابىلدايدى»، - دەپ جازدى مەملەكەت باسشىسى Twitter - دە.