قازاقستان مەن يران سىرتقى ىستەر مينيسترلەرى نە جايىن تالقىلادى

None
None
نۇر-سۇلتان. قازاقپارات - بۇگىن ق ر پرەمەر-ءمينيسترىنىڭ ورىنباسارى - سىرتقى ىستەر ءمينيسترى مۇحتار تىلەۋبەردى يران سىرتقى ىستەر ءمينيسترى موحامماد دجاۆاد زاريفپەن كەزدەسۋ وتكىزدى، دەپ حابارلايدى قازاقپارات ءتىلشىسى.

«بۇگىن ءبىز يران يسلام رەسپۋبليكاسىنىڭ سىرتقى ىستەر ءمينيسترى موحامماد دجاۆاد زاريفپەن وتە جەمىستى كەزدەسۋ وتكىزدىك. ونىڭ بارىسىندا ەكى ەل اراسىنداعى ىنتىماقتاستىقتىڭ قازىرگى احۋالىنا جانە ونىڭ بولاشاق دامۋىنا شولۋ جاسادىق. نۇر- سۇلتان مەن تەگەراننىڭ وڭىرلىك جانە حالىقارالىق ماسەلەلەرگە قاتىستى ءوزارا ۇستانىمدارى بويىنشا پىكىر الماستىق. بۇكىل الەمدى شارپىعان COVID-19 پاندەمياسى حالىقارالىق قاتىناستار جۇيەسىنە ەلەۋلى اسەر ەتتى. وسىعان قاراماستان، پاندەميا قاۋپى باسەڭدەگەن سوڭ ءبىز ەكىجاقتى ءىس- شارالاردى وتكىزۋ تۋرالى ۋاعدالاستىق»، - دەدى مۇحتار تىلەۋبەردى كەزدەسۋدەن كەيىن ب ا ق وكىلدەرىنە ارنالعان مالىمدەمەسىندە.

ونىڭ اتاپ وتۋىنشە، بۇگىنگى باسقوسۋدا كاسپييگە قاتىستى ەكىجاقتى جانە كوپجاقتى ىنتىماقتاستىققا باسا نازار اۋدارىلدى. 2018 -جىلى اقتاۋ قالاسىندا وتكەن بەسىنشى كاسپي سامميتىنىڭ تاريحي ماڭىزى ەرەكشە اتاپ ءوتىلدى. كاسپي تەڭىزىنىڭ قۇقىقتىق مارتەبەسى تۋرالى كونۆەنسيانىڭ باپتارىن ورىنداۋ جانە اقتاۋ سامميتىندە قول جەتكىزىلگەن ۋاعدالاستىقتاردى جۇزەگە اسىرۋ قاجەتتىگى كەلىسىلدى.

«ءبىز ەكى ەلدىڭ بىرىككەن ۇلتتار ۇيىمى، ازياداعى ءوزارا ىقپالداستىق جانە سەنىم شارالارى جونىندەگى كەڭەس، يسلام ىنتىماقتاستىق ۇيىمى، ەكونوميكالىق ىنتىماقتاستىق ۇيىمى جانە تاعى باسقا حالىقارالىق جانە وڭىرلىك ۇيىمدار شەڭبەرىندەگى ءوزارا ارەكەتتەستىگىن وڭ باعالادىق. ەكى مەملەكەتتىڭ ساۋدا- ەكونوميكالىق بايلانىسىنىڭ كوكجيەكتەرىن تالقىلاپ، كولىك- ترانزيت، اۋىل شارۋاشىلىعى جانە تاعى باسقا سالالارداعى ءوزارا ىقپالداستىقتىڭ قارقىنىن ءوسىرۋ قاجەتتىگىن اتاپ وتتىك»، - دەدى ق ر سىرتقى ىستەر ءمينيسترى.

سونىمەن قاتار تاراپتار پارسى شىعاناعى مەن ەۋروپا، رەسەي جانە قىتاي نارىقتارىنا تەز جەتۋگە مۇمكىندىك بەرەتىن وزەن (قازاقستان) - بەرەكەت (تۇرىكمەنستان) - ينچەبۋرۋن (يران) تەمىر جولىنىڭ الەۋەتىن تولىق پايدالانۋ ماڭىزدىلىعىن اشىپ ايتقان.

«2020 -جىلى قازاقستان مەن يران اراسىنداعى ساۋدا اينالىمى 237 ميلليون دوللاردى قۇراپ، 2019 -جىلعا قاراعاندا 37,2 پايىزعا تومەندەدى. وسى رەتتە ءارتۇرلى جاعدايعا بايلانىستى باسەڭدەگەن ەكىجاقتى تاۋار اينالىمى كولەمىن ارتتىرۋعا جان-جاقتى قولداۋ كورسەتۋ جولدارىن تالقىلادىق. ءبىز بۇل باعىتتاعى ۋاعدالاستىقتاردى قازاقستان- يران ساۋدا- ەكونوميكالىق ىنتىماقتاستىق جونىندەگى ۇكىمەتارالىق كوميسسيا اياسىندا جۇزەگە اسىرۋ قاجەت دەپ كەلىستىك. قازاقستان مەن يران اراسىنداعى ساۋدا اينالىمىنىڭ ارتۋىنا وڭ ىقپال ەتۋى ءتيىس يران مەن ەۋرازيالىق ەكونوميكالىق وداق اراسىندا قول قويىلعان ەركىن ساۋدا ايماعىن قۇرۋ جونىندەگى ۋاقىتشا كەلىسىمدى تولىق فورماتتى كەلىسىمگە اينالدىرۋ بويىنشا كەلىسسوزدەر ۇدەرىسىن قۇپتايمىز»، - دەدى مۇحتار تىلەۋبەردى.

اۆتور: مارلان جيەمباي

سوڭعى جاڭالىقتار