قاسىم- جومارت توقايەۆ قازاقستاندىق ۆاكسينانى سالدىرادى
بۇل تۋرالى «حابار 24» تەلەارناسىنىڭ «سۇقبات» باعدارلاماسىندا ق ر پرەزيدەنتىنىڭ باسپا ءسوز حاتشىسى بەرىك ءۋالي ايتتى، دەپ حابارلايدى قازاقپارات ءتىلشىسى.
«مەملەكەت باسشىسى قىستاعى جولداۋلارىنىڭ بىرىندە قازاقستاندىق ۆاكسينانى سالدىراتىنىن ايتىپ، بارلىق ازاماتتى ۆاكسينا الۋعا شاقىرعان بولاتىن. جالپى سالدىرۋ ويىندا بار. ول جايىندا دەر كەزىندە قۇلاعدار بولاسىزدار دەپ ويلايمىن»، - دەدى ول. سونىمەن قاتار بەرىك ءۋالي ءوزىنىڭ دە ۆاكسينا سالدىرۋ ويىندا بار ەكەندىگىن ايتتى.
«وزدەرىڭىز بىلەسىزدەر، بىلتىر ەلمەن بىرگە مەندە اۋىردىم. 20 كۇندەي اۋرۋحانادا جاتىپ ەمدەلدىم. ونىڭ بەس كۇنىندە رەانيماتسيادا جاتتىم. اۋىر جاعدايدى وتكەردىم. قۇدايعا شۇكىر، وتاندىق مەديتسينانىڭ ارقاسىندا ساۋىعىپ شىقتىم. تاياۋدا انتيدەنەمدى انىقتاتقانىمدا 74 پايىز بار بولىپ شىقتى. دارىگەرلەردىڭ پايىمىنشا، ول 30 پايىزدان تومەندەگەندە ۆاكسينا سالدىرۋعا بولادى ەكەن. وسى حابارعا كەلەردىڭ الدىندا دەنساۋلىق ساقتاۋ ءمينيسترى الەكسەي سويمەن كەڭەسكەنىمدە اۋىرىپ تۇرعان ادام 6 ايدان كەيىن ۆاكسينا سالدىرۋعا بولاتىندىعىن ايتتى. مەندە ۆاكسينا سالدىرسام دەپ وتىرمىن. وتاندىق ۆاكسينا بۇيىرتسا ءساۋىر ايىنىڭ سوڭىندا قولدانىسقا ەنگىزىلەدى»، - دەدى ول.
وسى رەتتە ول رەسەيلىك جانە قازاقستاندىق ۆاكسينانىڭ قايسىسىن سالدىراتىندىعىن اتادى.
«مەن وتاندىق ۆاكسينانى سالدىراتىن شىعارمىن. ويتكەنى، وتاندىق مەديتسينانى قولداۋ ءۇشىن سونى تاڭداپ وتىرمىن. سونىمەن قاتار بارشاڭىزدى ۆاكسينا سالدىرۋعا شاقىرامىن. مەملەكەت باسشىسىنىڭ ءوزى دە بىرنەشە رەت حالىقتى ۆاكسينا سالدىرۋعا شاقىرىپ، ىندەتتەن قۇتىلۋدىڭ جالعىز جولى ۆاكسينا ەكەندىگىن ايتتى. شىن مانىندە بۇكىل الەم حالقى سالدىرىپ جاتقاننان كەيىن كەرتارتپا پىكىرلەرگە ەرمەي، ۆاكسينا سالدىرۋ كەرەك»، - دەدى بەرىك ءۋالي.
اۆتور: مارلان جيەمباي