«ۇرپاعىنا ۇران بولعان انالار» اتتى كىتاپ جارىق كوردى - فوتو
وسىعان دەيىن «سۇيىنبيكە»، «بوزوق ارۋى» اتتى تۋىندىلارى باسىلىپ شىققان ەدى، دەپ حابارلايدى قازاقپارات ءتىلشىسى.
«بۇل ەڭبەكتە تاريحىمىزدا ەسىمى ەرەكشە اتالاتىن اياۋلى انالارىمىز بەن ارۋ قىزدارىمىزدىڭ ۇلتقا ۇلگى، ۇرپاققا ونەگە بولاتىن تاعىلىمدارى جانە ەلدىك مۇددە جولىنداعى يگىلىكتى ىستەرى كەڭىنەن قامتىلىپ جازىلعان. سونىڭ ىشىندە بورتە حانىم، قىزاي، اباق، قارقابات انالارىمىز تۋرالى قۇندى دەرەكتەر كەلتىرىلگەن. ەلدىك ىستەرگە ارالاسىپ، وتباسىنىڭ عانا ەمەس، تۇتاس ۇلتتىڭ ۇيىتقىسى بولا بىلگەن ءرابيا سۇلتان بەگىم، جاعان بيكە حانىم، بوپاي حانىم سياقتى تاريحي تۇلعالارىمىز دا نازاردان تىس قالماعان»، - دەپ جازدى ق ر پارلامەنت سەناتىنىڭ ءتوراعاسى ماۋلەن اشىمبايەۆ Facebook پاراقشاسىنا.
ونىڭ ايتۋىنشا، الداعى ۋاقىتتا بۇل باعىتتاعى جۇمىستار ءالى جالعاسادى. ويتكەنى مۇنداي تۋىندىلار - ۇلتتىڭ شەجىرەسىنەن سىر شەرتەتىن تاريح قانا ەمەس، جاس بۋىنعا ايتار وسيەتى مول قىمبات قازىنا.
«جاڭا كىتاپتى كوپشىلىككە تانىستىرۋ ءراسىمى قازاقستان جازۋشىلار وداعىنىڭ نۇر- سۇلتان قالالىق فيليالىندا ءوتتى. سول جەردە تۇرسىن جۇرتباي، ساۋىتبەك ابدراحمانوۆ، جانبولات اۋپبايەۆ جانە باسقا دا قالامگەرلەر ءسوز سويلەپ، ەڭبەكتىڭ الداعى جالعاسى جونىندە ءوز ۇسىنىستارىن ءبىلدىردى. وسى رەتتە تۋىندىنىڭ تۇساۋكەسەر ءراسىمىن ۇيىمداستىرعان جازۋشىلار وداعىنىڭ ەلوردالىق فيليالىنا، ونىڭ باسشىسى داۋلەتكەرەي كاپ ۇلى باۋىرىمىزعا، الىبەك اسقاروۆ اعامىزعا جانە وسى ەڭبەكتىڭ جارىق كورۋىنە اتسالىسقان بارشا ازاماتتارعا العىسىمدى بىلدىرەمىن. اسىل تەكتى ءازيز انالارىمىز جايىنداعى جاڭا كىتاپتىڭ وقىرمانى كوپ بولسىن»، - دەپ جازدى ماۋلەن اشىمبايەۆ.
اۆتور: زارينا قاھارمان