مانەرلەپ سىرعاناۋشى كسەنيا پانكراتوۆا باياناۋىلدىڭ سۇلۋلىعىن كورسەتىپ، جەلىنى تاعى دا قۋانتتى

الماتى. قازاقپارات - ۇلكەن الماتى كولىندە مانەرلەپ سىرعاناۋمەن تانىلعان الماتىلىق مانەرلەپ سىرعاناۋشى كسەنيا پانكراتوۆا بۇل جولى سولتۇستىك قازاقستان تابيعاتىنىڭ سۇلۋلىعىن كورسەتتى.

ول پاۆلودار وبلىسىنىڭ وڭتۇستىگىندەگى باياناۋىل ۇلتتىق پاركىنىڭ اۋماعىندا ورنالاسقان جاسىباي كولىندە سىرعانادى، دەپ حابارلايدى قازاقپارات. بۇل جولى ول شلەيفى ۇزىن كوك كويلەكپەن مانەرلەپ سىرعاناپ، جەلى قولدانۋشىلارىن تاعى ءبىر قۋانتتى.

«سولتۇستىك قازاقستانداعى پاۆلودار ماڭى - تاڭعاجايىپ جەر. مىندەتتى تۇردە جازدا تاعى كەلەمىن. بۇل ءبىر ۇمىتىلماس ساپار بولدى: ادەمى تابيعات، قوناقجاي ادامدار جانە تەلەگەي- تەڭىز جارقىن ەموتسيا! ءبىزدىڭ جۇمىسىمىزدى باعالايسىزدار دەپ ۇمىتتەنەمىن. بۇكىل الەمگە What is Kazakhstan-دى بىرگە كورسەتەيىك!» - دەپ جازدى مانەرلەپ سىرعاناۋشى Instagram پاراقشاسىندا.

ونىڭ ايتۋىنشا، بۇل بيىلعى جىلدىڭ ەڭ قيىن تۇسىرىلىمدەرىنىڭ ءبىرى بولعان. «مۇزدىڭ قالىڭ بولعانىنا قاراماستان، كولدىڭ بەتى سۋ. كويلەگىمنىڭ ەتەگى ابدەن سۋ بولىپ، سالماعى 10 كەلىگە باردى، ال قاتتى سوققان جەل مەنى ارتقا تارتىپ، كويلەگىم تاپ ءبىر پاراشيۋتكە اينالدى. ءسويتىپ العا ءجۇرۋىم قيىندادى. ءبىراق بەينەروليكتىڭ سوڭىندا كويلەكتەن شاشىراعان تامشىلاردى ايتساڭىزدارشى، بۇل - مەنىڭ سۇيىكتى ءساتىم...»، - دەدى كسەنيا.

وسى پوستتىڭ استىندا جەلى قولدانۋشىلارى ەموتسياسىن ءبولىسىپ، تاڭدانىسىن جاسىرمادى: «Wow, it's amazing. جوعارى دەڭگەيدە. سونداي ادەمى. تاڭعاجايىپ تابيعات، عاجايىپ كسيۋشا. وتە ادەمى جەر. كەرەمەت» دەپ جازدى ولار. جىل باسىندا كسەنيا پانكراتوۆا مۇز قاتقان قاپشاعاي سۋ قويماسىندا قىزىل كويلەكپەن سىرعاناپ ، جەلى قولدانۋشىلارىنىڭ كوزايىمى بولعان ەدى.

ايتا كەتۋ كەرەك، 2018 -جىلى جەلتوقساندا سپورتشى، باپكەر كسەنيا پانكراتوۆا ۇلكەن الماتى كولىندە مانەرلەپ سىرعاناپ، كوپشىلىكتىڭ كوڭىلىنەن شىققان ەدى. 23 جاستاعى سپورت شەبەرىنە كانديدات، فيگۋريست كسەنيا پانكراتوۆا سپورتتاعى مانسابىن اياقتاعانىن ايتتى. قازىر ول باپكەرلىكپەن اينالىسادى.

اۆتور: گۇلزات اقجولوۆا