اۋىل ماڭىنداعى جەرلەر قوعامدىق جايىلىمعا اينالۋعا ءتيىس - زاڭگەر

نۇر-سۇلتان. قازاقپارات – ق ر اۋىل شارۋاشىلىعى مينيسترلىگى جەر رەفورماسى كوميسسياسىنىڭ وتىرىسىندا زاڭگەر باقىتجان بازاربەك ءبىرقاتار ۇسىنىس ايتتى، دەپ حابارلايدى قازاقپارات ءتىلشىسى.

«اۋىل شارۋاشىلىعىنداعى جايىلىمدىق جەرلەردىڭڭ ارنايى راديۋسىن بەلگىلەۋ كەرەك. وكىنىشكە قاراي، جەر كودەكسىندە دە، زاڭعا تاۋەلدى اكتىلەردە دە راديۋس تۋرالى جازىلماعان. ناتيجەسىندە اۋىلدىڭ ماڭىنداعى بارلىق جەر شارۋا قوجالىقتارىنا بەرىلىپ تاستالعان. سوندىقتان جەر كوميسسياسىنىڭ جۇمىسى اياسىندا جەر كودەكسىنىڭ 109، 110-بابىنا ءتيىستى وزگەرىستەر ەنگىزىپ، ناقتى راديۋستى بەلگىلەۋىمىز كەرەك. سول راديۋس اياسىنداعى جەرلەر قوعامدىق جايىلىم جەرىنە اينالۋى ءتيىس»، - دەيدى «Bazarbek مەن Partners» زاڭ كومپانياسىنىڭ باس ديرەكتورى بازاربەك جۇمابەك ۇلى.

ول راديۋس جەرگىلىكتى اتقارۋ ورگانىنىڭ ءتيىستى مىندەتىنە اينالۋى كەرەك ونىڭ ايتۋىنشا، اتالعان راديۋستاعى جايىلىم جەرلەرىن جەرگىلىكتى اتقارۋ ورگانى ءوز باقىلاۋىنا الۋى ءتيىس.

«ەگەر حالىققا ءتيىستى جايىلىم جەرى جەتپەي تۇرسا، 1-2 شاقىرىم راديۋس كولەمىندەگى اۋىل شارۋاشىلىعى جەرلەرىن مەملەكەت ءوز قاجەتتىلىگى ءۇشىن الىپ، ونى قوعامدىق جايىلىمعا اينالدىرۋى كەرەك»، - دەيدى ول.