الماتى اكىمدىگى تاۋىق جۇمىرتقاسىنىڭ شەكتى باعاسىن بەلگىلەدى
قۇجاتقا سايكەس، I ساناتتى تاۋىق جۇمىرتقاسىنىڭ ون داناسى ءۇشىن 487 تەڭگە مولشەرىندە باعا بەلگىلەنىپ وتىر. ءتيىستى قاۋلى وسى ايدىڭ اياعىنا دەيىن جارامدى. اتالعان شارا نارىقتاعى ءونىمنىڭ قۇنىن تۇراقتاندىرۋعا جانە ساتۋشىلاردىڭ باعانى نەگىزسىز كوتەرۋىنە جول بەرمەۋ ءۇشىن قولعا الىنىپ وتىر.
«بۇدان بۇرىن الماتىدا مۇنداي رەتتەۋ مەحانيزمىن قولدانۋ وڭ ناتيجە كورسەتتى. وتكەن جىلدىڭ سوڭىندا قاراقۇمىق جارماسى مەن قانتقا شەكتى باعا بەلگىلەۋ قالادا ءونىمنىڭ ءبىر كەلىسىنىڭ ورتاشا قۇنىن سايكەسىنشە 375 تەڭگەدەن 360 تەڭگەگە دەيىن جانە 256 تەڭگەدەن 252 تەڭگەگە دەيىن تومەندەتۋگە مۇمكىندىك بەردى»، - دەپ حابارلادى قالا اكىمدىگىنىڭ باسپا ءسوز قىزمەتى.
قاۋلى بويىنشا بەكىتىلگەن باعالاردىڭ ساقتالۋىن الماتى كاسىپكەرلىك جانە ينۆەستيتسيالار باسقارماسىنىڭ ماماندارى اۋدان اكىمدىكتەرىمەن بىرلەسىپ باقىلايدى.
ەگەر كاسىپكەرلەر قاۋلىعا قۇلاق اسپاي، باعانى كوتەرگەن بولسا ايىپپۇل سالىنادى. اتالعان ءىس-ارەكەتتەر ءبىر جىلدىڭ ىشىندە قايتالانعان جاعدايدا، 100 ايلىق ەسەپتىك كورسەتكىشتەن (291700 تەڭگە) 200 ايلىق ەسەپتىك كورسەتكىشكە دەيىنگى (583400 تەڭگە) مولشەردە ايىپپۇل تۇرىندەگى اكىمشىلىك جاۋاپكەرشىلىككە تارتىلادى.