قاراعاندى وبلىسىنداعى تۇرمەلەردە كىتاپ وقيتىندارعا جەڭىلدىك جاسالادى

قاراعاندى. قازاقپارات - قاراعاندى وبلىسىنداعى باس بوستاندىعىنان ايىرۋ مەكەمەلەرىندە جازاسىن وتەپ جاتقان كىتاپقۇمار ادامدارعا جەڭىلدىك جاسالادى، دەپ حابارلايدى قازاقپارات.

ق ر ءى ءى م قىلمىستىق اتقارۋ جۇيەسى دەپارتامەنتى (ق ا ج د) باسپا ءسوز قىزمەتىنىڭ حابارلاۋىنشا، وڭىردە جازاسىن وتەپ جاتقاندار قازىر شارتتى تۇردە مەرزىمىنەن بوساتۋ جونىندە ءوتىنىش بەرۋدى كوزدەپ وتىر.

ولاردىڭ كوپشىلىگى «شەكاراسىز وقۋ» پيلوتتىق جوباسىنا قاتىسقاندار. بيىلعى جىلدىڭ قاڭتار ايىندا قاراعاندى وبلىسى بويىنشا ق ا ج د مەكەمەسىندە «شەكاراسىز وقۋ» پيلوتتىق جوباسى ىسكە قوسىلدى. ونىڭ ماقساتى سوتتالعانداردى وقۋ مادەنيەتىنە باۋلۋ، قاماۋدا وتىرعانداردىڭ ساۋاتىن ارتتىرۋ، سول ارقىلى ولاردىڭ تۇزەلۋىنە جاعداي جاساۋ جانە ىنتالاندىرۋ بولىپ تابىلادى.

بيىلعى جىلدىڭ 26- ناۋرىزىندا وبلىس بويىنشا مەكەمەلەردە پيلوتتىق جوبانى ىسكە اسىرۋ جونىندەگى كوميسسيالاردىڭ ءبىرىنشى وتىرىسى ءوتتى. قۇرامىنا مامانداندىرىلعان پروكۋراتۋرا، قوعامدىق باقىلاۋ كوميسسياسىنىڭ وكىلدەرى، قازاق جانە ورىس ادەبيەتىنىڭ وقىتۋشىلارى كىردى.

قوعامدىق تىڭداۋدىڭ ءبىرىنشى وتىرىسىنا 48 سوتتالعان ازامات قاتىستى. پيلوتتىق جوبانىڭ شارتتارىنا سايكەس جازاسىن وتەۋشىلەر ۇسىنىلعان كوركەم ادەبيەت شىعارمالارىن وقىپ، قايتالاپ، جەكە اسەرلەرى، ناقتى وقىلعان كىتاپقا قاتىستى پىكىرلەرى بار ەسسە ۇسىندى، سونىمەن قاتار قويىلعان سۇراقتارعا جاۋاپ بەردى.

كوميسسيا وقۋ مادەنيەتىنىڭ دارەجەسىن، ونىڭ ىشىندە نەگىزگى ويدى ءتۇسىنۋ، ءبولىپ كورسەتۋ، بۇرىن وقىلعانمەن سالىستىرۋ، جەكە قاسيەتتەردىڭ دامۋىن باعالادى.

«قاراعاندى وبلىسى بويىنشا ق ا ج د باسشىلىعىنا اتالمىش جوبا ءۇشىن العىس ايتقىم كەلەدى. سونىڭ ارقاسىندا مەنىڭ مۇگەدەك جۇبايىم شارتتى تۇردە مەرزىمىنەن بۇرىن بوساتۋعا ءوتىنىش بەرمەك»، - دەپ حابارلادى ا ك-159/7 مەكەمەسىندە جازاسىن وتەپ جاتقان سوتتالۋشىنىڭ جۇبايى.

جوبا كوميسسياسى وتىرىسىنىڭ قورىتىندىسى بويىنشا 30 دان استام سوتتالعان ادام ماراپاتتالدى.