حالىقارالىق ىزدەۋدە جۇرگەن تۇركىستان تۇرعىنى اتىراۋدا ۇستالدى

اتىراۋ. قازاقپارات - حالىقارالىق ىزدەۋدە جۇرگەن تۇركىستاندىق اتىراۋدا ۇستالدى، دەپ حابارلايدى قازاقپارات.

وبلىستىق پوليتسيا دەپارتامەنتىنىڭ باسپا ءسوز قىزمەتىنەن ءمالىم ەتكەندەي، 6№ ۋچاسكەلىك پوليتسيا بەكەتىنىڭ ۋچاسكەلىك پوليتسيا ينسپەكتورلارى 26- ناۋرىزدا ساعات 11:00 شاماسىندا كوشەدە ماس كۇيدە جۇرگەن ازاماتتى ۇستاعان.

«تەكسەرۋ كەزىندە ماس جىگىتتىڭ تۇركىستان قالاسىنىڭ تۇرعىنى ەكەنى انىقتالدى. جاسى - 38 دە. وعان قاتىستى ق ر اكىمشىلىك قۇقىقبۇزۋشىلىق تۋرالى كودەكسىنىڭ 440-بابىنىڭ 1-بولىگىمەن (الكوگولدىك ىشىمدىكتەردى ىشۋ نەمەسە قوعامدىق ورىندارعا ماساڭ كۇيدە كەلۋ) اكىمشىلىك حاتتاما تولتىرىلىپ، 5 ايلىق ەسەپتىك كورسەتكىش كولەمىندە ايىپپۇل سالىندى. سونداي-اق، ونىڭ 2017-جىلدان بەرى اليمەنت تولەۋدەن جالتارىپ، قاشىپ جۇرگەنى، وعان حالىقارالىق ىزدەۋ جاريالانعانى بەلگىلى بولدى» دەپ حابارلادى دەپارتامەنتتىڭ باسپا ءسوز قىزمەتىنەن.

ۇستالعان ازاماتقا قاتىستى زاڭدى شەشىم قابىلداۋ ءۇشىن اتىراۋ قالالىق پوليتسيا باسقارماسىنىڭ كوشى-قون قىزمەتى ءبولىمىنىڭ ماماندارى ءىس-قۇجاتتاردى جيناقتاپ جاتىر.