اقتوبەنىڭ باس مەملەكەتتىك سانيتار دارىگەرى تۇرعىندارعا ۇندەۋ جاسادى

اقتوبە. قازاقپارات - اقتوبە وبلىستىق سانيتاريالىق-ەپيدەميولوگيالىق باقىلاۋ دەپارتامەنتىنىڭ باسشىسى نۇرسۇلۋ بەركىمبايەۆا تۇرعىنداردى ساق بولۋعا شاقىردى، دەپ حابارلايدى قازاقپارات ءتىلشىسى.

اقتوبە وبلىسى 22-ناۋرىز كۇنى «سارى» ايماققا كىردى. وتكەن تاۋلىكتە تاعى 62 ادام كوروناۆيرۋس جۇقتىرعان. كوبى اقتوبە قالاسىنىڭ تۇرعىنى. سونىمەن بىرگە مارتوك، ويىل اۋداندارىندا دا دەرتتىڭ سيمپتومدى تۇرىنە شالدىققاندار انىقتالدى.

«قازىرگى تاڭدا ءۇي كارانتينىندە 941 ادام جاتىر. ولارعا مەديتسينالىق باقىلاۋ جۇرگىزىلۋدە. قاۋىپ سەيىلگەن جوق. سوندىقتان بارشاڭىزدى بەتپەردە تاعۋعا، قولدى ءجيى جۋىپ، انتيسەپتيكتەردى پايدالانۋعا، الەۋمەتتىك قاشىقتىقتى ساقتاۋعا شاقىرامىن. ءتۇرلى مەرەكەلىك ءىس-شارالاردى، تويلار مەن وتباسىلىق ءىس-شارالاردى وتكىزۋگە تىيىم سالىنعانىن تاعى دا ەسكە سالامىز!. سونىمەن قاتار، جەرگىلىكتى اتقارۋشى ورگان جانىنان ۇيىمداستىرىلعان موبيلدى توپتار تاراپىنان كاسىپكەرلىك وبەكتىلەرىندە كارانتين تالاپتارىن ساقتاۋ بويىنشا مونيتورينگ كۇشەيتىلگەنىن ەسكە سالامىز!. بەتپەردە ءتارتىبىن، الەۋمەتتىك قاشىقتىقتى جانە كارانتين تالاپتارىن قاتاڭ ساقتاڭىزدار!. قورعانىس قۇرالدارى ينفەكتسيانىڭ تارالۋىن ازايتۋعا كومەكتەسەتىنىن تۇسىنگەن ابزال. ءوزىڭىزدى جانە جاقىندارىڭىزدى ساقتاڭىزدار!»، - دەدى اقتوبە وبلىستىق سانيتاريالىق-ەپيدەميولوگيالىق باقىلاۋ دەپارتامەنتىنىڭ باسشىسى نۇرسۇلۋ بەركىمبايەۆا.

جالپى وبلىستا 5020 جاعداي تىركەلدى. ونىڭ %89,4 جازىلىپ شىقتى.