قازاقستاندىق اكتەرلەر فرانسۋز سەريالىنا تۇسەدى
«INFINITI شاعىن- سەريالىنىڭ ءتۇسىرىلىمى باستالعانىن حابارلاۋعا قۋانىشتىمىز، بۇل - قىزىقتى تەرگەۋ جۇمىستارى جانە بۇرىنعى كەڭەستىك قالا بايقوڭىردىڭ شالعاي جەرىنەن حالىقارالىق عارىش ستانسياسىنىڭ مودۋلدەرىنە العاشقى ساياحات. بۇل تريللەر قازاقتىڭ اسەم دالاسىن عارىشتىڭ قوزعالىسسىز ماڭگىلىگىنە قاراما- قايشى قويادى»، - دەلىنگەن Canal+ فرانسۋز تەلەكانالىنىڭ انونسىندا.
1-ناۋرىز كۇنى باستالعان ءتۇسىرىلىم قازاقستان، ۋكراينا جانە فرانسيا اۋماعىندا جۇرگىزىلەدى. رەجيسسەر - تەرري پۋرو. باستى رولدەردى فرانسۋز اكتريساسى سەلين ساللەت جانە قازاقستاندىق اكتەر دانيار الشىنوۆ وينايدى. سونىمەن قاتار، سەريالعا قازاقستاندىق اكتريسا سامال ەسلياموۆا تۇسەدى. سەريال مازمۇنىنا سايكەس، حالىقارالىق عارىش ستانسياسى بايلانىسقا شىقپاي قويادى.
ال ونىڭ ەكيپاجى اپاتقا ۇشىراۋ الدىندا. ونىمەن ءبىر مەزگىلدە، قازاقستاندا تۇرعىن ءۇيدىڭ شاتىرىنان امەريكالىق استروناۆت، حالىقارالىق عارىش ستانسياسىندا بولۋى ءتيىس ەنتوني كۋرتستىڭ باسىنان ايىرىلعان دەنەسى تابىلادى.
عارىش باعدارلاماسىنان شەتتەتىلگەن فرانسۋز استروناۆتى اننا زاراتي جانە قازاقستاندىق پوليتسەي يسااك تۇرعىن بۇل عاجايىپ پارادوكستى تەرگەۋگە تىرىسادى.
«جيىرما سەلفتەيپ، ءبىر جىلدىق توسۋ، زۋمدا ساعاتتارعا سوزىلعان وقۋلار، اقىرىندا مەن وسىندامىن. حالىقارالىق سەريالداعى مەنىڭ العاشقى ءرولىم. ءارقايسىسى ءبىر ساعاتتان 6 سەريا، ستسەنارييىنەن باس الۋ مۇمكىن ەمەس، قامقور تاماشا كوماندا، الاڭداعى اسا تالانتتى ارىپتەستەر. وسىنىڭ بارلىعى ءۇشىن، ءومىر ءسۇرۋ، جاڭا دۇنيەنى جاساۋ، قۋانۋ مۇمكىندىگى ءۇشىن شەكسىز العىس. ال، كەتتىك!.. .»، - دەپ جازدى د. الشىنوۆ Instagram-دا.
ەسكە سالايىق، د. الشىنوۆ بيىلعى قاڭتاردا نيۋ-يوركتەگى IMDb حالىقارالىق بايقاۋىندا «بوي اتبايا» فيلمى ءۇشىن «ەڭ ۇزدىك درامالىق اكتەر» نوميناتسياسىن جەڭىپ العان بولاتىن. ال سامال ەسلياموۆا 2018 -جىلى 71-كانن كينوفەستيۆالىندە ۇزدىك دەپ تانىلعان بولاتىن. اكتريسا رەسەيلىك رەجيسسەر سەرگەي دۆورتسيەۆويدىڭ «ايكا» اتتى كارتيناسىندا باستى ءرولدى سومدادى. كەيىن ەلباسى نۇرسۇلتان نازاربايەۆ سامال ەسلياموۆاعا «قازاقستاننىڭ ەڭبەك سىڭىرگەن قايراتكەرى» اتاعىن تابىستادى. 2019 -جىلدىڭ ناۋرىزىندا ول گونكونگتا وتكەن ازيا كينواكادەمياسىندا (Asian Film Awards Academy) «ازيانىڭ ۇزدىك اكتريساسى» سىيلىعىنا يە بولدى.
اۆتور: ميرا تولەندى قىزى