مەملەكەتتىڭ دە، قوعامنىڭ دا عىلىمعا كوزقاراسى جاقسارىپ كەلەدى - ە ۇ ۋ پروفەسسورى
بۇل پىكىردى قازاقستاننىڭ ۇزدىك وقىتۋشىسى توسبەلگىسىنىڭ يەگەرى، تەلەجۋرناليست، ل. ن. گۋميليەۆ اتىنداعى ە ۇ ۋ- ءدىڭ پروفەسسورى ۇلبوسىن ەسەنبەك ايتتى، دەپ حابارلايدى قازاقپارات.
«ەلىمىزدەگى عالىمداردىڭ ەڭ ۇزدىكتەرىن انىقتاپ، ولارعا جوعارى قۇرمەت كورسەتۋ - مەملەكەت ساياساتىنىڭ جارقىن كورىنىسى. بيىلعى جوعارى وقۋ ورنىنىڭ ۇزدىك وقىتۋشىسى بايقاۋى تۇڭعىش رەت اقپاراتتىق جۇيە كومەگىمەن وتكىزىلدى. بۇل بايقاۋدىڭ ءادىل، وبەكتيۆتى وتۋىنە ىقپال ەتتى. عالىمداردىڭ عىلىمي ەڭبەكتەرىن باعالاۋ كريتەريلەرى جاڭارتىلدى، باسىمدىقتار دۇرىس انىقتالدى»، - دەدى ۇ. ەسەنبەك ق ر ءبىلىم جانە عىلىم مينيسترلىگىندە وتكەن «جوعارى وقۋ ورنىنىڭ ۇزدىك وقىتۋشىسى» ماراپات راسىمىندە.
ونىڭ ايتۋىنشا، جىلدان-جىلعا مەملەكەتتىڭ دە، قوعامنىڭ دا عىلىمعا دەگەن كوزقاراسى جاقسارىپ، قولداۋى كۇشەيىپ كەلەدى. عالىمدار قاۋىمداستىعى بۇنداي ساياساتتى جاقسى سەزىنۋدە.
«سيفرلىق تەحنولوگيالار، جاساندى ينتەللەكت، كۆانت كومپيۋتەر سياقتى قۇبىلىستاردى قازاق عالىمدارى زەرتتەپ، بولجاپ، ناقتى ۇسىنىستار دايىنداعانى دۇرىس دەپ ويلايمىن. وسى باعىتتاعى عىلىمي زەرتتەۋلەرگە ەرەكشە كوڭىل ءبولىنۋى - ۋاقىت تالابى ەكەنى انىق. بۇگىنگى ۇزدىك وقىتۋشى سياقتى بايقاۋلار عالىمداردىڭ شابىتىن سەرپىلتىپ، جاڭا زەرتتەۋلەر تۋعىزادى دەپ سەنەمىن»، - دەيدى پروفەسسور.
ايتا كەتەيىك، ق ر ءبىلىم جانە عىلىم مينيسترلىگىندە 2020-جىلدىڭ «جوعارى وقۋ ورنىنىڭ ۇزدىك وقىتۋشىسى» اتاعىن العان عالىمداردى ماراپاتتاۋ ءراسىمى ءوتتى. ۇزدىك وقىتۋشى اتاعىن العان عالىمدارعا ءبىلىم جانە عىلىم ءمينيسترى اسحات ايماعامبەتوۆ سەرتيفيكاتتار مەن توسبەلگىلەر تاپسىردى.
ەلىمىزدە 150 ۇستاز «جوعارى وقۋ ورنىنىڭ ۇزدىك وقىتۋشىسى» اتاعىن يەلەندى.