قولعا بەرۋگە بولمايتىن زاتتار: نانىم- سەنىم مەن ىرىمدار

نۇر-سۇلتان. قازاقپارات - نانىم- سەنىم مەن ىرىمدار - ەرتەدەن كەلە جاتقان رۋحاني تۇسىنىكتەردىڭ ءبىرى. العاشقى كەزدە ادام بالاسىنىڭ نانىم- سەنىمى ولاردىڭ كاسىبىنە جانە قورشاعان ورتاسىنا بايلانىستى بولعان.

بۇگىندە ءار ەلدىڭ وزىنە ءتان ۇلتتىق ساناسىمەن استاسىپ جاتقان ىرىمى مەن نانىم- سەنىمى بار. بىرىنە كەيدە يلانىپ قالساڭ، ەندى بىرىنە كۇلە قارايسىڭ.

نانىم- سەنىم مەن ىرىمنىڭ ارعى جاعىندا بەلگىلى ءبىر تاربيەلىك ءمان دە بولادى. كەيدە اڭىزعا قۇرىلادى. عىلىم تىلىمەن ايتقاندا، ادامنىڭ بەلگىلى ءبىر مالىمەتتەردى، قۇبىلىستاردى، وي مەن كوزقاراستى، پىكىردى ەش كۇمانسىز قابىلداپ، مويىنداۋىندا كورىنەتىن پسيحيكانىڭ ەرەكشە كۇيى.

بۇگىن ءبىز قولعا بەرۋگە بولمايتىن زاتتار جايلى نانىم- سەنىم مەن ىرىمدار تۋرالى ايتپاقپىز. ونى جانىمىزدا جۇرگەن كەي جاندار دا ۇستانۋى مۇمكىن. ال ولاردىڭ شىعۋ تاريحى ءارقيلى. كەيبىرىن بىلسەك، كوبىن بىلمەيمىز.

1. تۇيىندەگەن پياز

ەگەر بىرەۋ ءتۇيىنى بار پيازدى قولىڭا ۇستاتسا، وندا ول ءوزىنىڭ جاعىمسىز ەموتسياسىن ساعان «اۋدارۋى» مۇمكىن. بۇل نانىمدى كەي ۇلت وكىلدەرى بەرىك ۇستانادى. سوندىقتان قولدان المايدى. قولدان السا باقىتسىزدىق پەن كەلەڭسىزدىك بولادى دەپ سانايدى.

2. اقشا

ءيا، اقشانى قولعا بەرمەيتىن تانىستارىڭىز كوپ بولار. اسىرەسە تۇندە قولعا بەرمەيدى دەگەن تۇسىنىك بار. بىرەۋ بايلىق سول اقشامەن كوشەدى دەپ تۇسىنسە، ەندى بىرەۋدە مۇلدە باسقا تۇسىنىك قالىپتاسقان.

نانىم بويىنشا اقشادا جاعىمسىز ەنەرگيا كوپ بولادى. ساعان دەيىن ول اقشانى اشۋلى نەمەسە ساراڭ ادام ۇستاسا، ونىڭ ەنەرگياسى اسەر ەتۋى مۇمكىن دەگەن دە سەنىم بار.

تاريحشىلار بۇل نانىمدى ەجەلگى ۋاقىتتا سيقىرشىلار اقشاعا ءتۇرلى ىرىم جاساپ، زيان كەلتىرەتىنى جايلى اڭىز ارقىلى تۇسىندىرەدى. ونى قولدان العان ادام سيقىرشىنىڭ ارباۋىنا ءتۇستى دەگەن ءسوز. وعان تۇسپەس ءۇشىن اقشانى اعاش ورىندىق ۇستىنە قويىپ قانا العان ءجون دەپ ساناعان. ادامدار اعاش سيقىردىڭ كۇشىن جويادى دەپ سەنگەن.

3. وتكىر زاتتار (بالتا، پىشاق، قايشى)

قولعا ۇستاتپايتىن زاتتار قاتارىنا بالتا، پىشاق پەن قايشى دا جاتادى. «قولعا بەرگەن ادامدار اراسىندا الاۋىزدىق پايدا بولىپ، ءبىر- بىرىمەن قىرقىسىپ قالۋى مۇمكىن» دەگەن تۇسىنىك بار.

نەگىزى بالتا، پىشاق پەن قايشىنى قاۋىپسىزدىك ءۇشىن قولعا ۇستاتپاعان ءجون- اق. الاتىن ادام وقىس قيمىلداپ قالسا، بولماسا قاراماي تۇرعاندا قولىن نەمەسە دەنەسىن جاراقاتتاپ الۋى مۇمكىن. سوندىقتان ساقتىق ءۇشىن دە بۇل نانىمنىڭ پايداسى بار.

4. جۇزىك

قولىنداعى جۇزىگىن شەشىپ بەرمەيتىن، شەشىپ بەرگىسى كەلسە دە قولىڭا ۇستاتپايتىن تانىستارىڭ بار بولۋى مۇمكىن. بۇل دا ءبىر نانىمنىڭ كورىنىسى. ەرلى- زايىپتى بولسا ارامىزعا سىزات ءتۇسۋى مۇمكىن دەپ ويلاسا، ەندى بىرەۋلەر جۇزىكتە يەسىنىڭ بار نەگاتيۆى جينالۋى مۇمكىن دەپ سەنەدى.

massaget.kz