الماتى وبلىسىنىڭ تۇرعىنى جەدەل جاردەم قىزمەتكەرلەرىنە شابۋىل جاسادى
«ساعات 16:17-دە 23-بريگادانىڭ 22-قوسالقى ستانسياسىنىڭ فەلدشەرى س. ا. ەلەكەنوۆ ەسىك قالاسىنا قاراستى ساياجايعا شاقىرتۋ بويىنشا شىققان. اۋا رايىنىڭ قولايسىزدىعىنا بايلانىستى كوماندا شاقىرىلعان جەرگە 16:32-دە جەتكەن. جەدەل جاردەم بريگاداسى جەتكەنشە ناۋقاس قايتىس بولىپ كەتكەن. فەلدشەر ەلەكەنوۆ پەن جۇرگىزۋشى مولداحمەتوۆتىڭ ايتۋىنشا، جەدەل جاردەم كەلگەندە ولاردى ەر ادام اگرەسسيۆتى جاعدايدا قارسى العان. ناۋقاستى تەكسەرگەن فەلدشەر ناۋقاستىڭ بيولوگيالىق ءولىمى تۋرالى مالىمدەگەن. اكەسىنىڭ قايتىس بولعانىن ەستىگەن ەر ادام پىشاق الىپ، جەدەل جاردەم قىزمەتكەرلەرىنە قاراي جۇگىرگەن»، - دەپ حابارلادى باسقارمادان.
مارقۇمنىڭ تۋىستارى ءمايىتتى كولىككە كۇشتەپ سالعان. ەڭبەكشىقازاق اۋداندىق كوپسالالى اۋرۋحاناسىنا كەلگەن كەزدە مارقۇمنىڭ ۇلى قىزمەتكەرلەردى بالاعاتتاپ، جەدەل جاردەم كولىگىنىڭ جۇرگىزۋشىسى مولداحمەتوۆتىڭ بەتىنەن ۇرىپ جىبەرگەن. ول جەرگە قۇلاپ، باسى اسفالتقا سوعىلعان.
«تاياق جەگەن جۇرگىزۋشىگە وقيعا ورنىندا مەديتسينالىق كومەك كورسەتىلىپ، اۋرۋحاناعا جاتقىزىلدى. اتالعان جاعدايمەن پوليتسيا اينالىسىپ جاتىر»، - دەپ اتاپ ءوتتى الماتى وبلىستىق دەنساۋلىق ساقتاۋ باسقارماسىنداعىلار.
اۆتور: الما مۇقانوۆا