شىعىس قازاقستان جولدارى قاشاننان باستاپ اقىلى بولادى؟
بۇل جايىندا «قازاۆتوجول» ۇلتتىق كومپانياسىنىڭ وكىلدەرى ش ق و- داعى قوعامدىق تىڭداۋ بارىسىندا ءمالىم ەتتى، دەپ حابارلايدى قازاقپارات.
ۇزىندىعى 464 شاقىرىم بولاتىن م-38 تاس جولىنىڭ پاۆلودار - سەمەي - قالباتاۋ ۋچاسكەسى بيىل اقىلى بولادى. پاۆلودار وبلىسىندا - 3، شىعىس قازاقستان وبلىسىندا - 8 باقىلاۋ اركاسى ورناتىلىپ، تەست رەجيمىندە ىسكە قوسىلدى.
ش ق و- داعى اقىلى ۋچاسكە سەمەي مەن شار قالالارى، سونداي-اق اققۋلى، بەسقاراعاي جانە جارما اۋداندارى ارقىلى وتەتىن جولدا بولادى. بۇعان دەيىن «قازاۆتوجول» پاۆلودار - ومبى جولى دا اقىلى بولاتىنىن حابارلاعان ەدى.
اقى الۋدىڭ اشىق جۇيەسى م-38 اۆتوجولىنىڭ بارلىق ۋچاسكەسىنە ەنگىزىلەدى.
قىتاي حالىق رەسپۋبليكاسى شەكاراسىنان قالباتاۋ اۋىلىنا دەيىنگى جول تەگىن بولىپ قالا بەرەدى.
پاۆلودار - سەمەي - قالباتاۋ ۋچاسكەسى Ⅱ تەحنيكالىق ساناتتاعى جولعا جاتادى. ياعني، جۇك كولىكتەرى ءۇشىن عانا اقىلى بولادى.
جالپى، ش ق و حالقى ايماق جولدارىنا اقىلى جۇيەنى ەنگىزۋدى قولدادى. ءبىراق، تۇرعىندار قىزمەتتەر مەن ازىق-تۇلىك باعاسىنىڭ وسۋىنە جول بەرمەۋ ءۇشىن جەرگىلىكتى جۇك كولىكتەرىنە، فەرمەرلەر مەن كوممۋنالدىق قىزمەت تەحنيكاسىنا جەڭىلدىك قاراستىرۋدى سۇرادى.
سونداي-اق، ش ق و تۇرعىندارى پاۆلودار - سەمەي - قالباتاۋ جولىن 4 قوزعالىس جولاعىنا دەيىن كەڭەيتۋدى، ءبولۋ جولاقتارى مەن مال وتە المايتىن قورشاۋ ورناتۋدى تالاپ ەتتى.