بەردىبەك ساپاربايەۆ تاجىكستان ەلشىسىن قابىلدادى
وبلىس اكىمى ەلدەردىڭ وڭىرلەرى اراسىنداعى ىنتىماقتاستىقتى نىعايتۋ قاجەتتىگىن اتاپ ءوتتى. بۇل ۇسىنىس جامبىل جەرىنە العاش رەت كەلگەن ەلشى تارابىنان دا قولداۋ تاپتى. حايرۋللو يبودزودا وبلىستىڭ الەۋەتى مەن مۇمكىنشىلىگىنە قاتىستى ساۋال جولدادى.
بەردىبەك ساپاربايەۆ قوناققا وبلىستىڭ اگرارلى-يندۋستريالدى ايماق ەكەندىگىن ايتىپ، نەگىزگى باعىتتارىمەن تانىستىردى.
ەگىنشىلىك جانە مال شارۋاشىلىعى بويىنشا ۇلكەن الەۋەتكە يە وڭىردە مينەرالدى تىڭايتقىشتار ءوندىرىسى دامىپ كەلە جاتقانىن تىلگە تيەك ەتتى.
«قازاقستان مەن تاجىكستان ەكەۋى دە ازيا ەلدەرى بولعاندىقتان، بىزگە ورتاق دۇنيەلەر كوپ. ەكى جاقتىڭ دا مۇددەلەرى توعىسادى. بىزدە ەكونوميكانىڭ ءتۇرلى سالالارىندا، اتاپ ايتساق اۋىل شارۋاشىلىعى، ونەركاسىپ، تۋريزم بويىنشا ءوزارا ىنتىماقتاستىق ورناتۋعا مۇمكىندىك جەتكىلىكتى، ونى ءتيىمدى پايدالانۋىمىز قاجەت»، - دەدى ب. ساپاربايەۆ.
ءوز كەزەگىندە حايرۋللو يبودزودا تاجىكستان جاستارىن قازاقستاننىڭ جوعارى وقۋ ورىندارىنا، ونىڭ ىشىندە تاراز قالاسىنا وقۋعا جىبەرۋگە نيەتتى ەكەنىن اتاپ ءوتتى. سونىمەن قاتار، تاجىكستان تارابى قازاقستاندا ەكى كوتەرمە-تاراتۋ ورتالىعىن اشۋدى جوسپارلاپ وتىر.
ەلشى ونداي ورتالىقتىڭ ءبىرىن ءبىزدىڭ وبلىستان سالۋعا ۇسىنىس ءبىلدىردى. وبلىس اكىمى بۇل باستامانى قولداپ، ورىنباسارى الماس ماديەۆكە وسى ماسەلە اياسىندا زەردەلەۋ جۇمىستارىن جۇرگىزۋدى تاپسىردى. سونداي-اق، كەزدەسۋدە تۋريزم باعىتىنداعى ىنتىماقتاستىقتىڭ بولاشاعى زور ەكەندىگى ايتىلدى.
بۇل ورايدا تارازدىڭ - تاريحى تەرەڭ قالالاردىڭ ءبىرى ەكەندىگىنە ايرىقشا نازار اۋدارىلدى.
تاجىكستان ەلشىسى تۋريستەر بىردەن بىرنەشە كونە قالالاردى ەركىن ارالاۋى ءۇشىن ورتالىق ازيا ەلدەرىنە ءبىرىڭعاي ۆيزا جاساۋ يدەياسىمەن ءبولىستى.
ايتا كەتەيىك، قازاقستان مەن تاجىكستان اراسىندا تىعىز قارىم-قاتىناس وڭ جولعا قويىلعان. پاندەمياعا قاراماستان، وتكەن جىلى ەكى مەملەكەت اراسىنداعى تاۋار اينالىمى 910 ميلليون دوللاردى قۇراعان.