قوس قولسىز تىگىنشى: سەنىم بولسا، كەز كەلگەن قيىندىق ەڭسەرىلمەك
كەزدەسۋ بارىسىندا انار بەكسۇلتانوۆا ەڭ الدىمەن، بالالىق شاعىنىڭ كۋاسى، ۇيادان كورگەن تاربيەسىنىڭ ارقاسىندا ۇلتتىق ونەردى بويىنا ءسىڭىرىپ، ءوزى ۇلگى بوپ وتىرعان اياۋلى قىزدارىنا دا بۇل كاسىپ ءتۇرىنىڭ دارىعاندىعىن جەتكىزدى. ول ەكى اياعىمەن ءىس تىگىپ، قازاقتىڭ ۇلتتىق ويۋلارىنىڭ سان تۇرىمەن جۇمىس جاساپ، قازىر دە زامان اعىمىنا قاراي جاستاردىڭ سۇرانىسىنا وراي ءتۇرلى قۇراق قۇراۋدا.
بيولوگيا ماماندىعى بويىنشا ءبىلىم العان اناردا و باستا تىگىن سالاسىنا كەلىپ، وسىلاي كاسىپ اشىپ كەتەمىن دەگەن وي مۇلدە بولماپتى. وتباسىنىڭ، باۋىرلارىنىڭ، ۇستازدارىنىڭ قولداۋىنىڭ ارقاسىندا كوپ دۇنيەنى مەڭگەرىپ، وزىنە دەگەن سەنىمدىلىگى ارتا تۇسكەن.
تاعدىردىڭ ءتۇرلى سىناعىندا ءوزىنىڭ وجەتتىگى مەن قايسارلىعىنىڭ، سەنىمدىلىگى مەن توزىمدىلىگىنىڭ ارقاسىندا مويىماعان قايسار انا ءوز ءومىرى تۋرالى بىلاي وي وربىتەدى:
«بۇل دۇنيەگە ەكى قولسىز كەلسەم دە، ءوزىمدى مۇمكىندىگى شەكتەۋلى جانداردىڭ قاتارىنانمىن دەپ ەسەپتەمەيمىن. بۇل - مەنىڭ كەمشىلىگىم ەمەس. جوعارى وقۋ ورنىن اياقتاپ، وبلىستىق مۋزەيدە جۇمىس ىستەپ، ەكى قىز تاربيەلەپ، كەيىننەن جەكە كاسىپكەرلىككە بەت بۇرىپ، بۇگىندە كاسىپكەر دەگەن اتقا يە بولىپ وتىرمىن. قازىر جۇمىس ىستەيمىن دەگەن ازاماتتارعا مەملەكەت تاراپىنان قولداۋ كوپ. تەك ەڭبەكتەنىپ، ىزدەنۋى كەرەك. ەشكىم الدىنا دايىن دۇنيەنى جاساپ الىپ كەلمەيدى. مەن اياعىممەن ءىس تىگۋمەن قاتار، سۋرەت سالۋ، باق گۇلدەرىن وسىرۋمەن اينالىسامىن. گۇلدى وسىرۋدە دە ەرەكشە كۇتىم كەرەك. ول دا ءبىر بالا ءتارىزدى. بىردە اۋىرىپ، بىردە ءتۇرلى كۇيگە ۇشىراپ وتىرادى. ءتىپتى، باقشامدا قىزدارىممەن قاتار ءوسىپ كەلە جاتقان گۇلدەر دە بار. ادامداردا العا دەگەن ۇمتىلىس، سەنىم بولسا، كەز كەلگەن قيىندىقتى ەڭسەرۋگە بولادى»، - دەيدى ول.
ايتا كەتۋ كەرەك، انار بەكسۇلتانوۆا «بيزنەستىڭ جول كارتاسى - 2020» باعدارلاماسى اياسىندا 3 ميلليون تەڭگە قايتارىمسىز گرانت ۇتىپ الىپ، تىگىن سەحىن اشقان بولاتىن. سودان بەرى ەلدەن تاپسىرىس الىپ، قىز جاساۋىن تىگۋدە. بۇگىندە تەحنيكالارىنىڭ سانىن دا ارتتىرا تۇسكەن. ول تاپسىرىس بەرۋشىلەردىڭ وتە كوپ ەكەندىگىن ايتادى.
انار اسەرلى اڭگىمە سوڭىندا بارشا نازىك جاندىلاردى كەلە جاتقان 8-ناۋرىز - حالىقارالىق ايەلدەر مەرەكەسىمەن قۇتتىقتادى
اۆتور: سايا سەمباي