شىمكەنتتىك جىگىتتىڭ ترەكتەرى قازنەتتى تاڭعالدىردى
ول قازاق اقىندارى ولەڭىن قازىرگى تانىمال ارتىستەردىڭ اۋەنىمەن ارلەيدى. سونداي-اق، شەتەلدىك اندەردى قازاق تىلىنە اۋدارادى، ءوزى ءان ايتادى.
ۇلى بريتانيالىق ءانشى Billie Eilish ستيلىندەگى اۋەنگە اباي قۇنانبايەۆتىڭ «اۋرۋ جۇرەك اقىرىن سوعادى جاي» ولەڭى ايتىلعان ۆيدەو Instagram-دا ءجۇز مىڭنان اسا قارالىم جيناعان. نۇح قالدىبايدىڭ تاعى ءبىر ۆيدەوسى - سول ءانشىنىڭ Lovely ءانىنىڭ قازاق تىلىنە اۋدارماسى TikTok-تا تانىمال بولدى.
نۇح قالدىباي مۇنداي ارالاس تۋىندىلاردى جاساۋىنىڭ سەبەبى جاسوسپىرىمدەر اراسىندا قازاق تىلىنە قىزىعۋشىلىقتى ارتتىرۋ ءۇشىن ەكەنىن ايتتى. مۋزىكانتتىڭ ءوزى مۇقاعالي ماقاتايەۆ، اباي قۇنانبايەۆ، جامبىل جابايەۆ، قادىر مىرزا ءالى مەن مۇحتار شاحانوۆتاردىڭ شىعارماشىلىعىمەن اۋەستەنەدى.
«مەنىڭ اتام قالدىباي وڭىرگە تانىمال جىرشى بولعان. سول كىسىدەن دارىعان بولار. ال اتا- انام بالا كەزىمنەن دومبىرا مەن ۆوكال ۇيىرمەسىنە اپارىپ، ونەرگە باۋلىدى.
مەن ولەڭدەردى تەك ءوز تالعامىما ساي تاڭدايمىن. اۋەن جازىپ جۇرگەنىمە ءبىراز ۋاقىت بولدى، ونى ۇلكەن اۋديتوريا تىڭداعانىن قالايمىن. مەنىڭ باستى مىندەتىم - انا ءتىلىمىزدى تانىتۋ»، - دەپ ءبولىستى مۋزىكانت.
نۇح التى جاسىنان باستاپ ءان ايتادى. دومبىرا، گيتارا جانە باياندا وينايدى. ول الەۋمەتتىك جەلىلەردەگى بارلىق تانىمال اندەردى قازاق تىلىنە اۋدارىپ، وڭدەپ شىعارادى. جىگىت 16 جاسىنان اۋەن جازاتىن باعدارلامالارمەن قىزىعاتىنىن ايتتى. قازىر ول 25 جاستا جانە دىبىس ارلەۋشى بولىپ جۇمىس ىستەيدى. ال بوس ۋاقىتىندا قازاق تىلىندە اندەر جازادى.
باسىندا الەۋمەتتىك جەلىدە قاراپايىم اندەردى تاراتىپ، سودان كەيىن ونى تۇرلەندىرۋدى ۇيعارعان. وسىلايشا، جاڭا وي پايدا بولدى.
«ءبىر اي بۇرىن وسى فورماتتى ءتۇسىرىپ، ونى جەلىدە جاريالاي باستادىم. الدىمەن كۇنىنە ەكى- ءۇش ۆيدەو ءتۇسىرىپ ءجۇردىم. ءقازىر جۇمىسىم بولعاندىقتان كۇن سايىن ءبىر ۆيدەو بولسىن شىعارۋعا تىرىسامىن»، - دەدى ول.
قازىر نۇحتىڭ 30 مىڭنان اسا تىڭداۋشى بار. ول باتىس ەستراداسىن عانا ەمەس، قازاقستاندىق انشىلەردى دە تىڭدايتىنىن ايتتى.
«مەنىڭ سۇيىكتى ورىنداۋشىلارىم - ايقىن، Argonya، «جىگىتتەر كۆارتەتى» جانە «مۋزارت « . مەنىڭ ارمانىم - Argonya-مەن بىرلەسىپ ءان جازۋ»، - دەدى ول.
بولاشاقتا مۋزىكانت اۆتورلىق اندەر شىعارۋدى جوسپارلاپ وتىر.
«مەن بۇل فورماتتى جالعاستىرىپ، ولاردى دامىتۋدى، قىزىقتى تاجىريبەلەر جاساۋدى جوسپارلاپ وتىرمىن. سونىمەن قاتار، جەكە شىعارماشىلىقپەن دە اينالىسىپ جاتىرمىن»، - دەپ تۇيىندەدى ول.
Tengrinews.kz