يزرايلدە ۆاكسينا الماعاندار اراسىندا كوروناۆيرۋس جۇقتىرۋ دەرەگى ءورشىدى

نۇر- سۇلتان. قازاقپارات – قاۋىپتى ۆيرۋستى ەندى تەك ۆاكسينا الماعاندار عانا جۇقتىرىپ ءجۇر ەكەن. ۇكىمەت حالىقتى ەكپە سالۋدا بەلسەندى بولۋعا شاقىرىپ، ۆاكسينانىڭ قوسىمشا مولشەرىن ساتىپ الدى.

COVID-19 دەرتىنەن جازىلعان ادامدارعا دا ەكپە ەگىلە باستالدى. قازىرگى كەزدە ونى 3,5 ميلليون ادام سالدىرعان. بۇل جالپى حالىق سانىنىڭ % 38- ءى. ال جاسى 16-دان اسقاندار اراسىندا بۇل كورسەتكىش % 53- كە جەتتى.

ءبىر عانا اۋرۋحانا دەرەگى ۆاكسينانىڭ تيىمدىلىگىن ايقىنداپ وتىر. بۇل كلينيكاعا تۇسكەن 300 ناۋقاستىڭ 10-ى عانا ۆاكسينانىڭ ءبىر ەكپەسىن سالدىرعان. ال ەكى رەت ەگىلگەندەر جوق.

دورون دوشنيتسكيي، دارىگەر:

- بالالار اراسىندا اۋرۋ جۇقتىرۋ جيىلەپ كەتكەنىن بايقادىق، ويتكەنى ولارعا ۆاكسينا ەگىلمەيدى. اۋرۋحانامىزعا نەگىزىنەن جاستار جاتقىزىلاتىن بولدى، اراسىندا اۋرۋى اسقىنعان ناۋقاستار دا بار. ال ەگدە جاستاعىلار بىزگە تۇسپەيدى، ولاردىڭ بارلىعى دەرلىك ۆاكسينا سالدىرعان.

ۇكىمەت بۋستەرلىك ۆاكسينالاۋ ءۇشىن پرەپاراتتىڭ قوسىمشا ميلليونداعان داناسىن ساتىپ الۋدى شەشتى. ياعني قوعامدىق يممۋنيتەتتى كۇشەيتۋ ءۇشىن ءۇشىنشى ەكپە سالۋدى قولعا الادى. بۇل ۆيرۋستىڭ جاڭا مۋتاتسيالارىنان قورعانۋ ءۇشىن كومەكتەسۋى ءتيىس. اۋرۋدان جازىلعانىنا ءۇش ايدان اسا ۋاقىت وتكەن ادامدارعا دا ۆاكسينا ەگۋ ۇيعارىلدى. ولارعا ءبىر ەكپە سالىنادى. ۇكىمەت لاقاپ سوزدەرگە سەنبەي، ۆاكسينالاۋدان وتۋگە شاقىرىپ وتىر. ايتپەسە، قايتا كارانتين ءتارتىبى ەنگىزىلەدى.

بينيامين نەتانياحۋ، يزرايل پرەمەر- ءمينيسترى:

- بىزگە ءبىر بوتەن زات ەككىزەدى، «ۆاكسينا - ول ۋ» دەگەن جالعان مالىمەت تارالىپ ءجۇر. بۇل نە ساندىراق، قايداعى بوتەن دەنە؟ كوروناۆيرۋس - بوتەن دەنە. ۆاكسيناسىز ادامدار دۇنيەدەن وزادى. ەكپە بولماعان زاماندا حالىق جاپپاي اۋرۋدان قىرىلعان. ورتاشا ءومىر ءسۇرۋ ۇزاقتىعى 30-40 جىل بولعان. قازىر وسى پرەپاراتتاردىڭ ارقاسىندا ءومىر ءسۇرۋ ۇزاقتىعى ەكى ەسە ءوستى. قازىر ەلدە بىرتىندەپ شەكتەۋلەر الىنا باستادى. كافە مەن مەيرامحانالارعا اشىق كەڭىستىكتە جۇمىس ىستەۋگە رۇقسات بەرىلدى. جاسىل ءتولقۇجات يەلەرى ىشىندە دە وتىرا الادى. دۇكەندەر مەن ساۋدا ورتالىقتارى، كىتاپحانالار مەن تەاترلار اشىلدى.

www.24.kz