بىزگە تىڭ ءارى باتىل قادامدار جاساۋ كەرەك - مەملەكەت باسشىسى

نۇر- سۇلتان. قازاقپارات – ق ر پرەزيدەنتىنىڭ جانىنداعى شەتەلدىك ينۆەستورلار كەڭەسىنە مۇشە مۇناي- گاز كومپانيالارى باسشىلارىنىڭ جۇمىس كەزدەسۋىندە قاسىم- جومارت توقايەۆ جەرگىلىكتى ءونىمدى ارتتىرۋ ماسەلەسىنە ارنايى توقتالدى، دەپ حابارلايدى قازاقپارات.

مەملەكەت باسشىسى بۇل رەتتە ول تەحنولوگيا ترانسفەرتىن جانە ءوندىرىستى ءبىر جەرگە شوعىرلاندىرۋدى قامتاماسىز ەتۋ ءۇشىن ناقتى شارالار ازىرلەۋ جونىندە ۇكىمەتكە بەرگەن تاپسىرماسىن ەسكە سالدى.

- مەن ەلىشىلىك قۇندىلىق (in-country value) قالىپتاستىرۋدا، ىشكى تەحنولوگيالىق جانە ونەركاسىپتىك دامۋدى ىنتالاندىرۋدا ەنەرگەتيكالىق جوبالاردىڭ ماڭىزدىلىعىن ۇنەمى ايتىپ كەلەمىن. وكىنىشكە قاراي، بۇل باعىتتاعى پروگرەسس ءماز ەمەس. بىزگە تىڭ ءارى باتىل قادامدار جاساۋ كەرەك، - دەدى پرەزيدەنت.

قاسىم- جومارت توقايەۆ ۇكىمەتكە كومپانيالارمەن بىرلەسىپ، تەحنولوگيالار ترانسفەرتى مەن لوكاليزاتسيا جونىندە جول كارتاسىن ازىرلەۋدى جانە بۇل جايىندا كەلەسى وتىرىستا بايانداۋدى تاپسىردى. ايتا كەتەرلىگى، جيىن بارىسىندا ەلىمىزدىڭ مۇناي- گاز سەكتورىن دامىتۋ جانە ونىڭ ينۆەستيتسيالىق تارتىمدىلىعىن ارتتىرۋ ماسەلەلەرى قاراستىرىلدى. ونلاين فورماتتاعى كەزدەسۋگە Royal Dutch Shell plc كونتسەرنىنىڭ باس اتقارۋشى ديرەكتورى بەن ۆان بەردەن، Chevron كورپوراتسياسىنىڭ ءوندىرۋ ماسەلەلەرى جونىندەگى ۆيتسە- پرەزيدەنتى دجەيمس دجونسون، CNPC كورپوراتسياسىنىڭ ۆيتسە- پرەزيدەنتى حۋان يۋن چجان، Eni S.p.A كومپانياسىنىڭ upstream بيزنەس جونىندەگى ديرەكتورى گۋيدو برۋسكو، ExxonMobil Global Projects كومپانياسىنىڭ پرەزيدەنتى نيل داففين، Total EP كومپانياسىنىڭ كاسپي جانە وڭتۇستىك ەۋروپا جونىندەگى ۆيتسە- پرەزيدەنتى كريستين حيلي قاتىستى.