قازاقستاندا بالا كۇتىمى بويىنشا جاردەماقىنى ۇلعايتۋ ۇسىنىلدى

None
None
نۇر- سۇلتان. قازاقپارات - «قازاقستان حالىق پارتياسى» فراكسياسىنىڭ دەپۋتاتتارى بالا كۇتىمى بويىنشا جاردەماقىنى ۇلعايتۋدى ۇسىندى، دەپ حابارلايدى قازاقپارات ءتىلشىسى.

«انالار مەن ولاردىڭ بالالارىنا قامقورلىق جاساۋ - ەلىمىزدەگى مەملەكەتتىك ساياساتىنىڭ اجىراماس بولىگى. جۇكتىلىك - ايەل ومىرىندەگى ماڭىزدى كەزەڭدەردىڭ ءبىرى. بالا كوتەرۋدىڭ قيىندىعى ءبىر بولەك تە، سونىمەن بىرگە جاۋاپتى مىندەت. ايەل جاڭا تۋعان نارەستەگە قامقورلىق جاساۋى كەرەك. سوندىقتان دەكرەتكە شىعادى. ال بوسانعاننان كەيىن 1 جاستان 3 جاسقا دەيىن نارەستەگە قامقورلىق جاسايدى. كورسەتىلگەن كەزەڭ بويى ول جۇمىس ىستەي المايدى. ءۇش جاسقا دەيىن بالالار ۇنەمى باقىلاۋدى قاجەت ەتەدى. سونىمەن قاتار وسى كەزەڭدە اتا- انالار ەڭ ۇلكەن قارجىلىق شىعىندارعا تاپ بولادى. ويتكەنى قازىرگى ۋاقىتتا تولىققاندى وتباسىندا تەك اكەسى عانا جۇمىس ىستەيدى»، - دەپ توقتالدى دەپۋتات ايجان سقاقوۆا پرەمەر- ءمينيستردىڭ ورىنباسارى ەرالى توعجانوۆتىڭ اتىنا جولداعان دەپۋتاتتىق ساۋالىندا.

«قازاقستان حالىق پارتياسى» فراكسياسى وكىلدەرىنىڭ اتاپ وتۋىنشە، مەملەكەت تاراپىنان بالا تۋۋدى ىنتالاندىرۋعا، سونىمەن قاتار دەنى ساۋ جاس ۇرپاقتى تاربيەلەۋگە جاعداي جاساۋعا ەكپىن قويىلۋى كەرەك. سوندىقتان ماتەريالدىق قولداۋ نازارعا الىنادى. ونىڭ سوزىنە قاراعاندا، قازاقستان رەسپۋبليكاسىندا بالا كۇتىمى جونىندەگى الەۋمەتتىك تولەم ول ءبىر جاسقا تولعانعا دەيىن عانا قولدانىلادى، ال جۇكتىلىگى جانە بوسانۋى بويىنشا الەۋمەتتىك تولەم تابىستى جوعالتۋعا بايلانىستى جۇمىس ىستەيتىن ايەلدەرگە عانا ەسەپتەلگەن.

جوعارىدا كەلتىرىلگەن فاكتىلەردى ەسكەرە وتىرىپ، ا. سقاقوۆا مىنالاردى ۇسىندى:

- ەڭ تومەنگى كۇنكورىس دەڭگەيىنە دەيىن بالا كۇتىمى بويىنشا جاردەماقىنى ۇلعايتۋ؛

- اقىلى دەكرەتتىك دەمالىس كەزەڭىن 1 جاستان 2 جاسقا دەيىن ارتتىرۋ، ويتكەنى بۇل بالانى مەكتەپكە دەيىنگى مەكەمەگە قابىلداۋدىڭ وڭتايلى جاسى؛

- بالانىڭ تولىققاندى دامۋى ءۇشىن بارلىق اسپەكتىلەردى، ونىڭ ىشىندە تاماق ونىمدەرىن، گيگيەنا قۇرالدارىن جانە دامۋ ورتالىقتارىنا كىرۋ مۇمكىندىگىن ەسكەرەتىن جەكە وبەكتيۆتى بالالار تۇتىنۋ سەبەتىن ازىرلەۋ.

اۆتور: رۋسلان عابباسوۆ

سوڭعى جاڭالىقتار