ماجىلىستە تەمەكى ونىمىنە قوسىمشا سالىقتى ۇيلەستىرۋگە ارنالعان قۇجات ماقۇلداندى

نۇر-سۇلتان. قازاقپارات - پارلامەنت ءماجىلىسىنىڭ جالپى وتىرىسىندا «ەۋرازيالىق ەكونوميكالىق وداققا مۇشە مەملەكەتتەردىڭ تەمەكى ونىمدەرىنە اكسيزدەر(قوسىمشا سالىقتار) سالاسىنداعى سالىق ساياساتىن جۇرگىزۋ قاعيداتتارى تۋرالى كەلىسىمدى راتيفيكاتسيالاۋ تۋرالى» زاڭ جوباسى ماقۇلداندى، دەپ حابارلايدى قازاقپارات ءتىلشىسى.

«كەلىسىم جوباسىندا 2024 -جىلدان باستاپ ينديكاتيۆتىك مولشەرلەمە مەن ودان اۋىتقۋ دياپازوندارىن قولدانۋ كوزدەلىپ وتىر. ەۋرازيالىق ەكونوميكالىق كوميسسيا كەڭەسىنە اكسيزدەردىڭ ينديكاتيۆتىك مولشەرلەمەلەرىن بەكىتۋ جانە نەگىزدەلگەن ەكونوميكالىق ورىندىلىعى بولعان جاعدايدا ولاردى وزگەرتۋ بويىنشا وكىلەتتىكتەر بەرۋ كوزدەلەدى. اكسيزدەر مولشەرلەمەلەرىن جاقىنداستىرۋ 2024 -جىلدان باستاپ جۇزەگە اسىرىلاتىن بولادى»، - دەدى ق ر ۇلتتىق ەكونوميكا ءمينيسترى اسەت ەرعاليەۆ.

ونىڭ ايتۋىنشا، ءاربىر بەس جىل سايىن ءبىرىڭعاي ينديكاتيۆتىك مولشەرلەمە جانە ودان اۋىتقۋ دياپازونى بەلگىلەنەدى.

«2024 -جىلى سيگارەتتەرگە قاتىستى ينديكاتيۆتىك مولشەرلەمە 1000 دانا ءۇشىن 35 ەۆروعا بالامالى مولشەردە ۇلتتىق ۆاليۋتادا بەلگىلەنگەن. ۇيلەسىمدىلىككە قول جەتكىزۋ ماقساتىندا سيگارەتتەرگە ارنالعان اكسيزدەردىڭ ناقتى مولشەرلەمەلەرى 2024 -جىلى ينديكاتيۆتىك مولشەرلەمەدەن تومەن جاعىنان 20 پايىز قوسىلمايتىن جانە ۇلكەن جاعىنا 20 پايىز اسپايتىن اۋىتقۋ دياپازونى بەكىتىلەدى»، - دەدى مينيستر.

«زاڭ جوباسى تەرىس الەۋمەتتىك- ەكونوميكالىق جانە قۇقىقتىق سالدارعا اكەپ سوقپايدى. بۇدان باسقا، زاڭ جوباسى تەمەكى ونىمدەرىنە ارنالعان اكتسيز مولشەرلەمەلەرىنىڭ ۇلعايۋى ەسەبىنەن بيۋدجەتكە قوسىمشا ءتۇسىمدى قامتاماسىز ەتەدى. وسىلايشا، كەلىسىم ەۋرازيالىق ەكونوميكالىق وداققا مۇشە مەملەكەتتەردىڭ اۋماعىندا تەمەكى ونىمدەرىنىڭ اكسيزدەرىن سالۋ سالاسىندا ءبىرىڭعاي پراكتيكا قولدانۋدى قامتاماسىز ەتۋگە مۇمكىندىك بەرەدى»، - دەدى ءا. ەرعاليەۆ.

اۆتور: رۋسلان عابباسوۆ