يتاليا ۆاكسيناعا كۇش بەرمەيتىن كوروناۆيرۋستىڭ جاڭا ءتۇرى تابىلعانىن مالىمدەدى
يتاليالىق ۆيرۋسولوگتەر قوعامىنىڭ پرەزيدەنتى جانە ميكروبيولوگيالىق زەرتحانانىڭ ديرەكتورى ارنالدو كارۋزو بۇل شتامعا قارسى قولدا بار ۆاكسينالار ءتيىمسىز بولۋى مۇمكىن دەپ سانايدى.
«يتاليادا العاش رەت ءبىز قازىرگى ۆاكسينالار ءتيىمسىز بولۋى مۇمكىن مۋتاتسيالارى بار شتامدى (نيگەريالىق) انىقتادىق»، - دەيدى ساراپشى.
دەگەنمەن شتامنىڭ ەرەكشەلىكتەرى تۋرالى مالىمەتتەر بەرىلمەگەن. وتكەن جىلدىڭ كوكتەمىندە پاندەميادان زارداپ شەككەن برەشيا ايماعىندا كوروناۆيرۋس جۇقتىرعاندار سانى تاعى دا ارتىپ كەلەدى. بۇل ءوز كەزەگىندە كارانتين شارالارىن قاتايتۋعا اكەلەدى. دەنساۋلىق ساقتاۋدىڭ جوعارى ينستيتۋتىنىڭ مالىمەتتەرى بويىنشا، قازىرگى ۋاقىتتا ەلدەگى ناۋقاستاردىڭ %54-64 بريتانيالىق شتامم جۇقتىرعاندار. اقپان ايىنىڭ باسىندا ونىڭ ۇلەسى %20 دان از بولدى.
يتاليالىق ماماندار پاندەميانىڭ «ءۇشىنشى تولقىنىنىڭ» باستالاتىندىعىن ايتادى. ۇكىمەت ەپيدەميولوگيالىق جاعدايى قولايسىز «قىزىل» ايماقتارداعى بارلىق مەكتەپتەر مەن بالاباقشالاردى جابۋ تۋرالى شەشىم قابىلدادى. وندا ءار 100 مىڭ تۇرعىننىڭ 200-250 ى ك ۆ ي جۇقتىرعان.
وسى ۋاقىتقا دەيىن كىشى مەكتەپ پەن بالاباقشالار شاعىن لوكداۋن جاعدايىندا جۇمىس ىستەگەن. يتاليادا پاندەميا باستالعاننان بەرى جۇقتىرعانداردىڭ سانى 3 ميلليونعا جاقىنداپ كەلەدى، كوروناۆيرۋس ينفەكسياسىنىڭ سالدارىنان 98 مىڭنان استام ادام قايتىس بولدى. سەيسەنبى كۇنى تاراتىلعان دەنساۋلىق ساقتاۋ مينيسترلىگىنىڭ مالىمەتتەرىنە سايكەس، سوڭعى تاۋلىكتە جۇقتىرعاندار سانى 17 مىڭعا، ءولىم-ءجىتىم 343 كە ءوستى.