اقمولا وبلىسىندا ونلاين مۋزەي ساباعى ءوتتى
اقمولا وبلىستىق مادەنيەت، ارحيۆتەر جانە قۇجاتتامالار باسقارماسى باسپا ءسوز قىزمەتىنىڭ مالىمەتىنشە، «مۋزەي كوللەكتسيالارىنداعى تاۋەلسىز قازاقستاننىڭ تاريحى» مۋزەي جوباسى اياسىندا «30 مۋزەيلىك ساباقتار» تسيكلى اقمولا وبلىستىق تاريحي-ولكەتانۋ مۋزەيىندە جالعاستى. مارينوۆ تاريحي-ولكەتانۋ مۋزەيىندە «رۋحانيات - بەيبىتشىلىك پەن كەلىسىمگە اپارار جول» تاقىرىبىمەن وتكەن ونلاين مۋزەي ساباعىندا قازاقستانداعى مەرەكەلىك كۇندەر كۇنتىزبەسىندە جاڭا مەرەكە - العىس ايتۋ كۇنىنىنىڭ پايدا بولۋ تاريحى؛ XIX عاسىردىڭ سوڭى مەن XX عاسىردىڭ باسى جانە ورتاسىندا قازاقستانعا قونىس اۋدارۋ، دەپورتاتسيالاۋ تاريحى بويىنشا ەكسكۋرس وتكىزىلدى.
مارينوۆ تاريحي-ولكەتانۋ مۋزەيىنىڭ مەڭگەرۋشىسى ەلميرا ايتجانوۆا اتاپ وتكەندەي، ساباق قوعامداعى تولەرانتتى رۋحاني كەلىسىم سياقتى نورمالارعا ارنالعان. قازىرگى ادام مىندەتتى تۇردە تولەرانتتى بولۋى كەرەك. تولەرانتتى ادام - ءوزىن-ءوزى باعالاۋ سەزىمى بار جانە باسقالاردى قۇرمەتتەيتىن ادام. تولەرانتتىلىق جەكە ادامنىڭ، توپتىڭ، جالپى قوعامنىڭ جوعارى رۋحاني جانە ينتەللەكتۋالدىق دامۋىنىڭ بەلگىسى بولىپ سانالادى.
«ادام ومىردە ءارتۇرلى ۇلت وكىلدەرىمەن، الەۋمەتتىك توپتارمەن قارىم-قاتىناس جاسايدى، سوندىقتان ءوز حالقىنىڭ دا، باسقا مادەنيەت پەن ءدىن وكىلدەرىنىڭ دە مادەني قۇندىلىقتارىن قۇرمەتتەۋدى ۇيرەنۋ، ورتاق ءتىل تابۋدى ۇيرەنۋ ماڭىزدى. سونىمەن قاتار، توزىمدىلىك ادامنىڭ ساپاسى رەتىندە جاڭا كۇتپەگەن جاعدايلارعا ءساتتى بەيىمدەلۋ ءۇشىن قاجەت دەپ سانالادى.
توزىمدىلىككە يە ەمەس ادامدار ءومىر تالاپ ەتەتىن وزگەرىستەرگە قابىلەتسىز بولىپ كەلەدى»، - دەيدى مۋزەي مەڭگەرۋشىسى.
بۇگىندەرى قازاقستان كوپتەگەن حالىقتاردىڭ ۇيىنە اينالىپ وتىر. بەيبىتشىلىك، كەلىسىم مەن بىرلىك سالتانات قۇرعان ءۇي.
قازاقستان حالىقارالىق ارەنادا بەيبىتشىلىك اۋماعى، مادەنيەتتەر مەن دىندەردىڭ ۇندەسىپ، جاقىنداسقان الاڭى رەتىندە قابىلدانادى.