اسقار مامين قىرعىزستان پرەزيدەنتى سادىر جاپاروۆپەن كەلىسسوز جۇرگىزدى
ۇكىمەت باسشىسى سادىر جاپاروۆتىڭ قازاقستانعا ساپارى قازاقستان - قىرعىزستان ستراتەگيالىق ىنتىماقتاستىعىن ودان ءارى نىعايتۋعا جاڭا سەرپىن بەرەتىنىنە سەنىم ءبىلدىردى.
«بۇگىن جوعارى دەڭگەيدە ماڭىزدى ۋاعدالاستىقتارعا قول جەتكىزىلدى. قازاقستان ۇكىمەتى بارلىق ماسەلەلەردى شەشۋ، سونداي-اق ءوزارا قىزىعۋشىلىق تۋدىراتىن جاڭا باستامالاردى ازىرلەپ، ىسكە اسىرۋ بويىنشا قىرعىز ارىپتەستەرىمەن سىندارلى بىرلەسكەن جۇمىس جۇرگىزۋگە نيەتتى»، — دەدى ا. مامين.
تاراپتار ساۋدا-ەكونوميكالىق، ينۆەستيتسيالىق، سۋ-ەنەرگەتيكالىق، ترانزيتتىك-كولىك جانە شەكارا ماڭى ىنتىماقتاستىعىنىڭ وزەكتى ماسەلەلەرىن، سونداي-اق COVID-19 عا قارسى كۇرەس اياسىنداعى بىرلەسكەن شارالاردى تالقىلادى.
ونەركاسىپتە، اۋىل شارۋاشىلىعىندا، ءبىلىم بەرۋ مەن تۋريزمدە ءوزارا ءىس-قيمىلدى ودان ءارى كەڭەيتۋ ءۇشىن ۇلكەن الەۋەتتىڭ بار ەكەنى اتاپ ءوتىلدى. سونداي-اق ە ا ە و جانە باسقا دا ينتەگراتسيالىق بىرلەستىكتەر شەڭبەرىندەگى ءوزارا ءىس-قيمىل ماسەلەلەرى قارالدى.
قازاقستان قىرعىزستان ەكونوميكاسىنىڭ ءىرى ينۆەستورلارىنىڭ قاتارىنا كىرەدى. 2005-جىلدان باستاپ قازاقستاننان قىرعىزستانعا تىكەلەي ينۆەستيتسيالاردىڭ جيناقتالعان كولەمى شامامەن $1 ميلليارد قۇرايدى، ق ر- دا شامامەن 1,5 مىڭ قىرعىز كومپانياسى جۇمىس ىستەيدى. 2020-جىلى ەكىجاقتى تاۋار اينالىمى $796,2 ميلليون.
تاراپتار بۇل كورسەتكىشتى $1 ميللياردقا دەيىن جەتكىزۋگە جانە ساتىلاتىن تاۋارلار مەن قىزمەتتەر نومەنكلاتۋراسىن كەڭەيتۋگە نيەتتى. ەكونوميكالىق ىنتىماقتاستىقتى جانداندىرۋ ماقساتىندا جاقىندا ۇكىمەتارالىق كەڭەستىڭ كەزەكتى وتىرىسىن وتكىزۋ جوسپارلانىپ وتىر.