رەسەيدە ادام ولتىرۋگە تاپسىرىس العان قازاقستاندىقتار ۇستالدى

نۇر-سۇلتان. قازاقپارات - رەسەيدە كىسى ولتىرمەك بولدى دەگەن كۇدىكپەن ەكى قازاقستاندىق ۇستالدى.

كراسنويار ولكەسى مەن حاكاسيا رەسپۋبليكاسى بويىنشا رەسەي فەدەراتسياسى تەرگەۋ كوميتەتى سايتىندا 17- اقپاندا جەلەزنوگورسك قالاسىندا ءۇش ادام ايەلگە شابۋىل جاساپ، پىشاقتاپ كەتكەنى جاريالاندى، - دەپ حابارلايدى Tengrinews.kz ءتىلشىسى.

زارداپ شەككەن ادام اۋىر حالدە اۋرۋحاناعا جاتقىزىلدى. ول تەرگەۋشىلەرگە تۇركيادا تۇراتىن كۇيەۋى قاستاندىق ۇيىمداستىرۋى مۇمكىن ەكەنىن ايتقان.

پوليتسەيلەر 29 جانە 30 جاستاعى قازاقستان ازاماتىن، سونداي-اق 39 جاستاعى رەسەي ازاماتىن ۇستادى.

الدىن الا بولجام بويىنشا، ۇستالعاندار 2020-جىلى جەلتوقساننىڭ سوڭى مەن 2021-جىلى قاڭتاردىڭ باسىندا شەتەلدىك ازاماتتان 30 جاستاعى ايەلدى ولتىرۋگە تاپسىرىس العان.

17- اقپاندا تاڭەرتەڭ ءۇش ەر ادام الدىن الا دايىنداعان قاستاندىق ارەكەتىن جۇزەگە اسىرۋ ءۇشىن بالاباقشاعا بارىپ، ايەلدىڭ بالالاردى الىپ كەتۋىن كۇتىپ وتىرعان. كەلگەن بويدا ونى پىشاقپەن جاراقاتتاپ، وزدەرى قاشىپ كەتكەن. كراسنويارسكىگە كەلىپ، سول جەردەن ۇشاقپەن ماسكەۋگە كەتكەن. ولاردى دومودەدوۆو اۋەجايىندا پوليتسيا قىزمەتكەرلەرى قۇرىقتادى.

«جاۋاپ الۋ بارىسىندا ايىپتالۋشىلار ايەلدى ولتىرۋگە تاپسىرىس تۇركيا رەسپۋبليكاسى ازاماتىنان تۇسكەنىن ايتىپ، كىناسىن مويىندادى. تاپسىرىس بەرگەن ەر ادام جابىرلەنۋشىنىڭ جۇبايى. تاپسىرىس ءۇشىن ولاردىڭ ءارقايسىنا 10 نان 30 مىڭ دوللارعا دەيىن اقشالاي سىياقى بەرگەن»، - دەلىنگەن حابارلامادا.

جابىرلەنۋشى ايەل كۇيەۋىنىڭ كەلىسىمىنسىز بالالاردى الىپ رەسەيگە كەتكەنىن جانە سوعان بايلانىستى جۇبايى قىلمىستى جوسپارلاۋى مۇمكىن ەكەنىن ايتتى.