ەلباسى قىرعىزستان پرەزيدەنتى سادىر جاپاروۆپەن كەزدەستى
كەلىسسوز باستالار الدىندا ەلباسى مەن قىرعىز رەسپۋبليكاسىنىڭ پرەزيدەنتى نازاربايەۆ ورتالىعىنداعى ەكسپوزيتسيالاردى ارالاپ كوردى. كەزدەسۋ بارىسىندا نۇرسۇلتان نازاربايەۆ سادىر جاپاروۆتى قىرعىزستان پرەزيدەنتى بولىپ سايلانۋىمەن قۇتتىقتادى.
- قازاقستانعا قوش كەلدىڭىز. قىرعىزستان حالقى وتكەن سايلاۋدا وزىڭىزگە ۇلكەن سەنىم ءبىلدىردى. حالقىڭىزدىڭ جارقىن بولاشاعى جولىنداعى جۇمىسىڭىزعا تابىس تىلەيمىن، - دەدى قازاقستاننىڭ تۇڭعىش پرەزيدەنتى.
ەلباسى تاۋەلسىزدىك جىلدارى باۋىرلاس ەكى ەل اراسىندا قول جەتكىزىلگەن ىنتىماقتاستىق پەن سەرىكتەستىكتىڭ جوعارى دەڭگەيىن اتاپ ءوتتى. سونداي- اق نۇرسۇلتان نازاربايەۆ قازاقستان مەن قىرعىزستان پرەزيدەنتتەرى اراسىنداعى كەلىسسوزدەردىڭ ناتيجەلى بولعانىنا توقتالىپ، بيزنەس بايلانىستاردى كۇشەيتۋدىڭ جانە ەكونوميكالىق قاتىناستاردى نىعايتۋدىڭ ماڭىزدىلىعىن ايتتى.
ءوز كەزەگىندە سادىر جاپاروۆ قازاقستاننىڭ تۇڭعىش پرەزيدەنتىنە ەكى ەل اراسىندا بايلانىس ورناتۋ جانە نىعايتۋ جولىنداعى جاسامپاز ەڭبەگى ءۇشىن العىسىن ءبىلدىردى.
- ءسىزدى ورتالىق ازيانىڭ كوشباسشىسى عانا ەمەس، سونداي- اق الەمدىك دەڭگەيدەگى بەدەلدى ساياساتكەر رەتىندە دە قۇرمەتتەيمىن! ءسىز ءبىزدىڭ حالىقتارىمىزدىڭ دوستىعى مەن ىنتىماقتاستىعىن ارتتىرۋعا زور ۇلەس قوستىڭىز، - دەدى قىرعىز رەسپۋبليكاسىنىڭ پرەزيدەنتى.
