قاسىم- جومارت توقايەۆ قىرعىز پرەزيدەنتىمەن كەزدەسۋدە اباي مەن ماعجاننىڭ سوزدەرىن كەلتىردى
وندا قازاقستان پرەزيدەنتى قازاق پەن قىرعىز بايلانىسىنىڭ تامىرى تەرەڭدە ەكەنىن ايتا كەلىپ، ۇلى اباي مەن ماعجان جۇمابايەۆتىڭ سوزدەرىن تىلگە تيەك ەتتى، دەپ حابارلايدى قازاقپارات.
«ۇلى اباي ايتقانداي، «ەش قازاق قىرعىز بەن قازاقتىڭ ءبىر تۇقىمداس ەكەنىنە تالاسپايدى». قوس حالىقتىڭ رۋحاني تۋىستىعىن دالەلدەيتىن مىسالدار جەتكىلىكتى. بۇل بايلانىستار اۋەزوۆ پەن ايتماتوۆ، جامبىل مەن توقتاعۇل، كەنەن مەن وسپانقۇل سياقتى الىپ تۇلعالارىمىزدىڭ تۇسىندا نىعايا ءتۇستى. قازاقتىڭ ايگىلى اقىنى ماعجان جۇمابايەۆ «قىرعىز - تاۋدىڭ تارپاڭى، قازاق - قىردىڭ قۇلانى» دەپ جىرلاعان. مۇنىڭ ءبارى ءبىزدىڭ ارعى تەگىمىزدىڭ ءبىر ەكەنىن اڭعارتادى، - دەدى قازاقستان پرەزيدەنتى كەڭەيتىلگەن قۇرامداعى كەزدەسۋ بارىسىندا.
ءوز كەزەگىندە قىرعىز رەسپۋبليكاسىنىڭ پرەزيدەنتى قازاقستان باسشىلىعى مەن حالقىنا كوروناۆيرۋسقا قارسى كۇرەستە قولداعانى ءۇشىن جانە الداعى ۋاقىتتا دا اۋقىمدى كومەك كورسەتە بەرەتىنىنە العىس ايتتى.
- بۇگىنگى كەلىسسوزدەر ءداستۇر بويىنشا مەملەكەتتەرىمىز اراسىنداعى ءوزارا قارىم- قاتىناستاردى سيپاتتايتىن وداقتاستىق بايلانىستار مەن ستراتەگيالىق سەرىكتەستىك رۋحىندا وتۋدە. شاعىن فورماتتا وتكەن كەزدەسۋدە ءبىز قاسىم- جومارت كەمەل ۇلىمەن ەكىجاقتى ىنتىماقتاستىق پەن وڭىرلىك جانە حالىقارالىق ۇيىمدار اياسىنداعى ەلدەرىمىزدىڭ ءوزارا ءىس- قيمىلىنىڭ ءبىرقاتار ماڭىزدى ماسەلەلەرىن قوزعادىق. ەكى ەل اراسىندا ەشقانداي ساياسي قايشىلىق جوق ەكەنىن مالىمدەيمىن، - دەدى سادىر جاپاروۆ.
