الماتىدا پوليتسيا قىزمەتكەرى قاراۋسىز قالعان قۇرىلىس نىسانىنان قۇلاپ كەتتى

None
None
الماتى. قازاقپارات - الماتىدا پوليتسيا قىزمەتكەرى قاراۋسىز قالعان قۇرىلىس نىسانىنان قۇلاپ، جاراقات الدى، دەپ حابارلايدى قازاقپارات ءتىلشىسى.

الماتى قالالىق پوليتسيا دەپارتامەنتىنىڭ مالىمەتىنشە، الاتاۋ اۋدانىنىڭ يۋۆەنالدى پوليتسيا قىزمەتكەرى قۇرىلىسى بىتپەگەن كوپقاباتتى ءۇيدىڭ توبەسىنە شىققان 16-17 جاس ارالىعىنداعى جاسوسپىرىمدەرگە ەسكەرتۋ جاساماق بولىپ كوتەرىلگەن.

«پوليتسەي جاسوسىپىرىمدەرمەن پروفيلاكتيكالىق اڭگىمە جۇرگىزۋ كەزىندە ءسۇرىنىپ، تومەنگى قاباتقا قۇلاپ كەتكەن. قازىرگى ۋاقىتتا وعان وپەراتسيا جاسالدى، ءبىراق جاعدايى اۋىر. كامەلەتكە تولماعانداردىڭ اتا-انالارىنا قاتىستى اكىمشىلىك كودەكستىڭ 127-بابى بويىنشا حاتتاما جاسالدى. جاسوسىپىرىمدەر قاۋىپسىز جەرگە شىعارىلدى. ەشقايسىسى زارداپ شەككەن جوق»، - دەپ حابارلادى پوليتسيادان.

وسى وقيعاعا بايلانىستى جاراقات العان پوليتسەيدىڭ قارىنداسى الەۋمەتتىك جەلى ارقىلى قالا اكىمى باقىتجان ساعىنتايەۆتان كومەك سۇرادى.

«باقىتجان ساعىنتايەۆ مىرزا، قانداي دارىگەر مامانداردىڭ كومەگى قاجەت ەكەنىن انىقتاپ، باۋىرىمنىڭ ومىرىنە اراشا ءتۇسۋىڭىزدى سۇرايمىن. ونىڭ 3 بالاسى، اياعى اۋىر ايەلى، 80 گە كەلىپ قالعان قارت اناسى بار. سونداي-اق، بىرنەشە جىلدان بەرى ءۇيدى سالىپ بىتىرمەگەن قۇرىلىس مەكەمەسى باسشىلىعىن جاۋاپقا تارتۋىڭىزدى سۇرايمىن»، - دەدى ول.


اۆتور: الما مۇقانوۆا


سوڭعى جاڭالىقتار