قاسىم-جومارت توقايەۆ سادىر جاپاروۆپەن شاعىن قۇرامدا كەلىسسوزدەر وتكىزدى
ەكى ەلدىڭ مەملەكەتتىك ءانۇراندارى ورىندالعاننان كەيىن قۇرمەت قاراۋىلى روتاسىنىڭ باستىعى قازاقستان مەن قىرعىزستان پرەزيدەنتتەرىنە راپورت بەردى.
مەملەكەت باسشىلارى قۇرمەت قاراۋىلىنىڭ الدىنان ءوتىپ، شاعىن قۇرامدا كەلىسسوزدەر جۇرگىزۋ ءۇشىن رەزيدەنتسيانىڭ «شىعىس زالىنا» باردى. قاسىم-جومارت توقايەۆ سادىر جاپاروۆتىڭ پرەزيدەنت رەتىندە العاشقى مەملەكەتتىك ساپارىن قازاقستاننان باستاعانىنىڭ ماڭىزى زور ەكەنىن اتاپ ءوتتى.
- بۇل قازاقستانعا دەگەن ۇلكەن قۇرمەت. ساپارىڭىزدىڭ ءرولى، ماعىناسى ايىرىقشا دەپ ايتۋعا بولادى. سەبەبى بۇل ساپار ەكى ەلىمىزدىڭ اراسىنداعى قارىم-قاتىناستارعا ۇلكەن سەرپىن بەرەدى. شىن مانىندە ساپارىڭىزدىڭ باعدارلاماسى اۋقىمدى. سوندىقتان ءبىز بۇگىن ەڭ وزەكتى ماسەلەلەر بويىنشا پىكىر الماسامىز. قۇداي قالاسا، ەكى حالىقتىڭ مۇددەسىنە ساي ءتيىستى كەلىسىمدەرگە قول جەتكىزەمىز دەپ ويلامىن، - دەدى مەملەكەت باسشىسى.
قاسىم-جومارت توقايەۆ قازاق- قىرعىز بايلانىستارى اراسىندا ءداستۇرلى دوستىقتىڭ بار ەكەنىنە، سونداي-اق، قىرعىزستان - ەلىمىز ءۇشىن تەك وداقتاس مەملەكەت قانا ەمەس، باۋىرلاس مەملەكەت ەكەنىن جەتكىزدى.
- بۇل ءداستۇردى جوعارى باعالايمىز. الدىمىزدا تۇرعان مىندەتىمىز وسى ءداستۇردى جالعاستىرۋ، نىعايتۋ. سوندىقتان بۇگىنگى كەلىسسوزدەردىڭ ماڭىزى زور، - دەدى مەملەكەت باسشىسى. ءوز كەزەگىندە، قىرعىزستان پرەزيدەنتى قاسىم-جومارت توقايەۆقا قازاقستانعا مەملەكەتتىك ساپارمەن شاقىرعانىنا ريزاشىلىعىن ءبىلدىردى. سادىر جاپاروۆ ەكى ەل اراسىنداعى قارىم-قاتىناستاردىڭ تەرەڭ ەكەنىن سيپاتتاي وتىرىپ، قازاقتىڭ بەلگىلى اقىنى جۇبان مولداعاليەۆتىڭ سوزدەرىن ەسكە الدى.
- مەن قازاقپىن، قىرعىز ول - تۋىسقانىم،
بىرگە تارتقان تارلاننىڭ قۇيىسقانمىن.
انامىز دا قارا كوز ءبىر قىز، بالكي،
ءبولىپ بەرگەن ەگىزگە ۋىس نانىن، - دەپ قازاق اقىنىنىڭ پوەماسىنان ءۇزىندى كەلتىردى، قىرعىز پرەزيدەنتى. سادىر جاپاروۆ قازاقستان مەن قىرعىزستان اراسىندا ىنتىماق پەن باۋىرلاستىق ورناپ، ەشقاشان شەشىلمەيتىن ماسەلەلەر بولماۋى كەرەك ەكەنىن ايتتى.
سادىر جاپاروۆ قاسىم-جومارت توقايەۆتى وزىنە ىڭعايلى ۋاقىتتا قىرعىزستانعا ساپارمەن كەلۋگە شاقىردى. كەزدەسۋ بارىسىندا قازاقستان مەن قىرعىزستان پرەزيدەنتتەرى ەكىجاقتى ستراتەگيالىق سەرىكتەستىكتىڭ اۋقىمدى ماسەلەلەرى، اتاپ ايتقاندا، ساياسي، ساۋدا- ەكونوميكالىق، ينۆەستيتسيالىق، كولىك- لوگيستيكالىق، سۋ- ەنەرگەتيكالىق، كوروناۆيرۋس ىندەتىنە قارسى بىرلەسكەن شارالار، مادەني- گۋمانيتارلىق باعىتتار، سونداي-اق، ەۋرازيالىق ينتەگراتسيا جانە كوپجاقتى قۇرىلىمدار اياسىنداعى بايلانىستاردى تالقىلادى.
