«قازىر ءبارى تانيدى» - قىرعىزستان پرەزيدەنتىنەن اۋمايتىن قازاق جىگىتى
ءبىر اپتا بۇرىن Instagram-قولدانۋشى اديناي ماريپوۆا قىرعىزستاندىق ساياساتكەر مەن قازاقستاندىق دارىگەردىڭ سۋرەتتەرىنەن كوللاج جاريالادى. سۋرەت الەۋمەتتىك جەلىلەردە تاراپ، ەندى بىشكەك تۇرعىندارى كوشەدە اسقاردان سۋرەتكە ءتۇسۋدى ءجيى سۇرايدى.
دارىگەر Tengrinews.kz تىلشىسىنە ساياساتكەرگە ۇقساستىعىن اتا-اناسى قالاي قابىلداعانىن جانە وسىنداي تانىمال بولعان سوڭ ءومىرى قالاي وزگەرگەنىن ايتتى.
«مەن قازىر ەكى قالادا - بىشكەك پەن تارازدا تۇرامىن. بىشكەكتە قىرعىزستان مەملەكەتتىك مەديتسينالىق اكادەمياسىنىڭ سەگىزىنشى كۋرسىندا وقيمىن. مەنىڭ سۋرەتىم جەلىدە قارىنداسىمنىڭ ارقاسىندا تارادى، ول سادىر جاپاروۆتىڭ سۋرەتىمەن كوللاج جاساپ، بلوگەرگە جىبەردى. بۇرىن جاپاروۆ پرەزيدەنت بولعانعا دەيىن ءبىزدىڭ ۇقساستىعىمىزدى اعا بۋىن عانا اتاپ وتەتىن، قازىر ءبارى تانيدى، كوشەدە سۋرەتكە تۇسۋگە ءجيى ءوتىنىش ايتادى. باسىندا ىڭعايسىزداناتىنمىن، قازىر ۇيرەنىپ كەتتىم، ۇيالمايمىن. ءبىراق جالپى العاندا ءومىرىم وزگەرگەن جوق، ءبارى باياعىداي»، - دەدى اسقار.
اسقار بايدىلدانىڭ وتباسى تارازدا تۇرادى، ءبىراق ول بىشكەكتە ورتوپەديالىق ورتالىق اشپاق.
«اتا-انام مەملەكەتتىك قىزمەتشى بولعان، قازىر زەينەتتە. ولار ءبىزدىڭ ۇقساستىعىمىزدى كورگەندە، ارينە، قاتتى تاڭعالدى. ۇيلەنگەنمىن، ايەلىم شىمكەنت تۋماسى، بۇكىل وتباسىم تارازدا تۇرادى. ەندى بىشكەكتە ورتوپەديالىق ورتالىق اشقىم كەلەدى، ويتكەنى بۇل سالا ەلدە ەندى دامىپ كەلەدى»، - دەيدى جاس دارىگەر.
ازىرشە دارىگەر بالالارعا ماسساج جاساۋمەن اينالىسادى.
«قىرعىزستان پرەزيدەنتىنىڭ اكىمشىلىگى مەنىمەن بايلانىسقا شىققان جوق، ءبىراق ەگەر ولار كەزدەسۋگە شاقىرسا، مەن قۋانا بارامىن، بۇل مەنىڭ تاعى ءبىر ارمانىما اينالدى»، - دەدى ول.
