ونەر جۇلدىزدارى «العىسىم شەكسىز» اكسياسىن ۇيىمداستىردى

نۇر- سۇلتان. قازاقپارات - «قازاقكونتسەرت» ۇيىمىنىڭ ارتىستەرى العىس ايتۋ كۇنىنە وراي «العىسىم شەكسىز» اتتى قايىرىمدىلىق اكتسياسىن وتكىزدى، دەپ حابارلايدى قازاقپارات ءتىلشىسى.

ءىس- شارا اياسىندا قازاق كونسەرت ارتىستەرى ەل يگىلىگى ءۇشىن ادال ەڭبەك ەتىپ، ءاردايىم قيىن كەزەڭدە حالىقتىڭ جانىنان تابىلاتىن ازاماتتارعا قولداۋ كورسەتىپ، ەرەن ەڭبەگى ءۇشىن العىس ايتتى. ولاردىڭ قاتارىندا جەدەل جاردەم قىزمەتكەرلەرى، ءتارتىپ ساقشىلارى، ءورت سوندىرۋشىلەر مەن قالا تازالىعىنا جاۋاپتى جۇمىسكەرلەر بار. قايىرىمدىلىق اكتسياسى «Asai new star» كومپانياسىمەن بىرلەسە ۇيىمداستىرىلدى.

قالا كوشەلەرىندەگى قوعامدىق ءتارتىپ، تازالىق پەن حالىق دەنساۋلىعىن ءجىتى باقىلاۋدا ۇستاپ، تاۋلىك بويى تىنباي جۇمىس ىستەيتىن قىزمەتكەرلەرگە ىستىق تاماق پەن شاي ۇسىنىلدى.

«العىس ايتۋ كۇنى - ەلدىڭ بىرلىگىن ارتتىراتىن، جاقسىلىق پەن مەيىرىمدى ۇلىقتايتىن مەرەكە. قازاقكونتسەرت ارتىستەرى كوكتەمنىڭ العاشقى مەرەكەسىن وسىلايشا ءوزارا ىنتىماقتاستىقتى ارتتىراتىن يگى داستۇرمەن باستادى. وسى ارقىلى ءبىز العىس ايتۋ مەرەكەسىنىڭ ىزگىلىگىن اسقاقتاتىپ، تاربيەلىك ءمان- ماڭىزىن ارتتىرۋعا ۇلەس قوستىق دەپ ويلايمىن»، - دەيدى «قازاقكونسەرت» ۇيىمىنىڭ ءارتىسى، بەلگىلى ءانشى قۇرماش ماحان.