قىرىمبەك كوشەربايەۆ: قاسيەتتى تاۋەلسىزدىگىمىزدى كوزدىڭ قاراشىعىنداي ساقتاۋ - بارشا قازاقستان حالقىنىڭ اسىل مۇراتى

None
None
نۇر- سۇلتان. قازاقپارات - قاسيەتتى تاۋەلسىزدىگىمىزدى كوزىمىزدىڭ قاراشىعىنداي ساقتاپ، وسكەلەڭ ۇرپاققا امانات ەتۋ - بارشا قازاقستان حالقىنىڭ اسىل مۇراتى. بۇل تۋرالى قازاقستان تاۋەلسىزدىگىنىڭ 30 جىلدىعىنا جانە العىس ايتۋ كۇنىنىڭ 5 جىلدىعىنا ارنالعان دوڭگەلەك ۇستەل بارىسىندا ق ر مەملەكەتتىك حاتشىسى قىرىمبەك كوشەربايەۆ ايتتى، دەپ حابارلايدى قازاقپارات ءتىلشىسى.

«ەلىمىزدە كوكتەمنىڭ العاشقى كۇنىن - العىس ايتۋ كۇنى دەپ بەلگىلەۋدىڭ ەرەكشە سيمۆوليكالىق ءمانى بار. ەجەلدەن ەركىن دالادا تابيعاتپەن ۇندەسىپ تاعدىر كەشكەن حالقىمىز ءۇشىن كوكتەممەن بىرگە كەلەتىن ءاز- ناۋرىز - جاڭارۋ مەن جاسارۋدىڭ، جاقسىلىق پەن ىرىس- ىنتىماقتىڭ نىشان رەتىندە ايشىقتالعان. بۇگىنگى ب ا ق- تا جاريالانعان مەملەكەت باسشىسىنىڭ، ەلباسىنىڭ، كوپتەگەن قازاقستاندىقتاردىڭ جولداعان قۇتتىقتاۋلارىنداعى يگى تىلەكتەر قابىل بولعاي! مىڭ دا ءبىر راقمەت، تاڭىرگە، تاعدىرعا، وتانداستارعا، قازاق حالقىنا!»، - دەدى قىرىمبەك كوشەربايەۆ قازاقستان تاۋەلسىزدىگىنىڭ 30 جىلدىعىنا جانە العىس ايتۋ كۇنىنىڭ 5 جىلدىعىنا ارنالعان دوڭگەلەك ۇستەل بارىسىندا.

وسى رەتتە ول بيىل ءتاۋ ەتەر تاۋەلسىزدىگىمىزگە 30 جىل تولىپ وتىرعانىن اتاپ ءوتتى.

«ادامزات تاريحىندا ءاربىر ەل ەجەلگى زامانداردان بەرى ازاتتىق پەن ەركىندىك ءۇشىن ارپالىسىپ كەلە جاتقانى بەلگىلى. ءبىزدىڭ اتا- بابالارىمىز دا ارايلى ازاتتىق ءۇشىن قانشا عاسىرلار بويى قانىن توگىپ، جانىن بەردى. ەگەمەندىك ءۇشىن كۇرەستى، ەركىندىك ءۇشىن تىرەستى. مىنە، وسى قاسيەتتى تاۋەلسىزدىگىمىزدى كوزىمىزدىڭ قاراشىعىنداي ساقتاپ، قازىعىن بەكىتىپ، وسكەلەڭ ۇرپاققا امانات ەتىپ قالدىرۋ ءبىزدىڭ، ياعني، بارشا قازاقستان حالقىنىڭ اسىل مۇراتى، اسىل پارىزى دەپ بىلەمىز»، - دەدى ول.

قىرىمبەك كوشەربايەۆ تاعدىرىندا «تالاي تار جول، تايعاق كەشۋدەن» ءوتىپ، «مىڭ ءولىپ، مىڭ تىرىلگەن» قازاق حالقى وتكەن عاسىردىڭ وزىندە مىڭ سان الاپات پەن زۇلماتتى باستان وتكەرگەنىنتاريحتان بەلگىلى ەكەندىگىنە نازار اۋدارتتى.

«سونىڭ ىشىندە حالقىمىزدى تەڭ جارتىسىنان ايىرعان اشارشىلىق زامانىنداعى ورنى تولماس تاقسىرەت، ەركىندىك جولىنداعى ساياسي قۋعىن- سۇرگىنگە ۇشىراعان الاش ارىستارىنىڭ قاسىرەتتى تاعدىرى جانە باسقا دا قاتەرلى كەزەڭدەر قازاق حالقىنىڭ ساعىن سىندىرىپ، جىگەرىن مۇقاتا العان جوق. تاۋەلسىزدىككە دەگەن كۇرەس ەشقاشان تولاستاعان ەمەس. تاعدىردىڭ وسىنداي تالاي سىناعىنا توتەپ بەرە ءجۇرىپ، جانى جومارت، مىنەزى قايسار قازاق حالقى كەڭەستەر كەزىندە دۇربەلەڭگە ءتۇسىپ، دەپورتاتسياعا ۇشىراعان كوپتەگەن ۇلتتار مەن ۇلىستارعا پانا بولدى. قۇشاعىن جايىپ، ەسىگىن اشتى. شيەتتەي بالا- شاعاسىنىڭ اۋىزىنان جىرىپ، ءبىر ءتۇيىر ناندى ءبولىسىپ جەدى. ءبارى ءبىر كىسىنىڭ بالاسىنداي باۋىرمال تىرشىلىك كەشتى. حالقىمىزدىڭ سول ىستىق ىقىلاسى بۇگىنگى تاۋەلسىزدىك جىلدارى ىرگەسى سوگىلمەس بەرەكە مەن بىرلىكتىڭ، ىرىسى مول تىرلىكتىڭ كەپىلىنە اينالىپ وتىر»، - دەدى مەملەكەتتىك حاتشى.

بۇل ورايدا ول تاۋەلسىزدىكتىڭ نىعايۋى مەن ەلىمىزدەگى سان ەتنوستاردىڭ ىنتىماق پەن بىرلىكتە ءومىر سۇرۋىنە ىقپال ەتكەن تۇڭعىش پرەزيدەنت - ەلباسىنىڭ اريحي ءرولى مەن ولشەۋسىز ەڭبەگىن ەرەكشە اتاپ كورسەتۋىمىز كەرەكتىگىن ايتتى.

«ەتنوسارالىق كەلىسىم، قوعامدىق بەيبىتشىلىك پەن تۇراقتىلىق تۇڭعىش پرەزيدەنت نۇرسۇلتان نازاربايەۆتىڭ مىزعىماس ءۇش ۇستانىمىنا جانە ساياسي فيلوسوفياسىنىڭ بەرىك تۇعىرىنا اينالدى. ەلباسىنىڭ وسى سارابدال ساياسي ۇستانىمىن بۇگىنگى تاڭدا مەملەكەت باسشىسى قاسىم- جومارت توقايەۆ تەرەڭ پايىممەن، ورنىقتى باعىتپەن، تاعلىمى مول ساباقتاستىقپەن دايەكتى تۇردە جالعاستىرىپ وتىر»، - دەدى قىرىمبەك كوشەربايەۆ.

اۆتور: مارلان جيەمباي

سوڭعى جاڭالىقتار