قانداستار اتىنان قازاق حالقىنا العىس ايتامىز - ماعاۋيا سارباسوۆ

نۇر-سۇلتان. قازاقپارات - ەلباسى ۇندەۋىمەن تاريحي وتانىمەن قايتا قاۋىشقان قانداستار قاۋىمى اتىنان بارشا باۋىرلاردى قۇشاق جايا قارسى العان قازاق حالقىنا رياسىز ريزالىق ءبىلدىرىپ، شەكسىز العىس ايتقىمىز كەلەدى!

بۇل پىكىردى «وتانداستار قورى» ك ە ا ق ۆيتسە-پرەزيدەنتى ماعاۋيا سارباسوۆ ايتتى.

*

«قازاقستان رەسپۋبليكاسىنىڭ تۇڭعىش پرەزيدەنتى - ەلباسى نۇرسۇلتان ءابىش ۇلى نازاربايەۆتىڭ جارلىعىمەن 5 جىلدان بەرى ايرىقشا قۇرمەتپەن اتالىپ وتەتىن «العىس ايتۋ كۇنى» - ەڭ الدىمەن ەلىمىزدە تىنىشتىق پەن ۇندەستىك، ءوزارا سەنىمدىلىك پەن كۇللى قازاقستان حالقىنا دەگەن شىنايى قۇرمەتتىڭ ورنىعۋىنا نەگىز بولعان ۇلت كوشباسشىسىنىڭ بەيبىتشىلىك پەن كەلىسىم ساياساتىنىڭ سالتاناتتى كۇنى.

بۇل - تاعدىر تاۋانىمەن ۇلى دالامىزعا قونىس اۋدارعان ءتۇرلى ەتنوستاردىڭ قۇتتى قونىسىنا اينالعان قاسيەتتى قازاق جەرى مەن قوناقجاي حالقىمىزعا جاسالعان تاعزىمنىڭ بەلگىسى. قازاق حالقى قيىن-قىستاۋ زاماندا ولاردىڭ باسىنا تۇسكەن اۋىرتپالىقتى قايىسپاي بىرگە كوتەرە ءبىلدى. بۇل بۇگىنگى تاڭدا ەلىمىزدەگى ءتۇرلى ۇلت وكىلدەرى اراسىنداعى ادامگەرشىلىك قارىم-قاتىناستىڭ ونەگەلى ولشەمىنە اينالدى.

العىس ايتۋ كۇنى - ەل باسىنا كۇن تۋعان كۇردەلى كەزەڭدى يىق تىرەسە بىرگە ەڭسەرىپ، تاۋەلسىز قازاقستاندى قۇرۋ جولىندا ايانباي تەر توككەن بارلىق ازاماتتاردىڭ ءبىر-بىرىنە قۇرمەت بىلدىرەتىن كۇنى.

ورايلى وسى ساتتە «وتانداستار قورى» اتىنان جانە ءوز اتىمنان ەگەمەندى ەلىمىزدەگى بىرەگەي بىرلىك پەن ۇلتارالىق تاتۋلىقتىڭ ۇيىتقىسى بولعان قازاقستان حالقى اسسامبلەياسىن قۇرىلعانىنا 26 جىل تولۋىمەن دە شىن جۇرەكتەن قۇتتىقتايمىن!

اعىنان جارىلىپ، العىس ايتۋ - رياسىز ريزالىقتىڭ نىشانى، سوندىقتان بۇگىنگى جيىندا ەلدەگى قانداستار مەن شەتتەگى وتانداستار اتىنان العىس ارناۋىمىزعا تولىق نەگىز بار دەپ ويلايمىن.

بىرىنشىدەن، بيىل - قازاقستان رەسپۋبليكاسى تاۋەلسىزدىگىنىڭ 30 جىلدىق مەرەيتويى. ەڭ الدىمەن ايتارىم:

اق بىلەكتىڭ كۇشىمەن، اق نايزانىڭ ۇشىمەن ۇلان-بايتاق ۇلى دالامىزدى قورعاعان اتا-بابامىزدىڭ اسىل ارمانى بولعان ازاتتىقتىڭ اق تاڭىن ءناسىپ ەتكەن اللاعا سانسىز شۇكىر، شەكسىز العىس!

كەشەگى كەڭەستەر وداعى تاراپ، ەنشىسىن العان ەگەمەندى ەلىمىزدى تاۋەلسىزدىك تاۋەكەلىنە باستاپ، اۋمالى-توكپەلى كەزەڭدە تىعىرىقتان الىپ شىققان سارابدال ساياساتكەر ەلباسىمىزعا العىس ايتامىز!

قازاقستان رەسپۋبليكاسى دەربەس مەملەكەت رەتىندە ءوز تاۋەلسىزدىگىن جاريا ەتە سالا تۇڭعىش پرەزيدەنتىمىز تاعدىر تاۋانىمەن شارتاراپقا تارىداي شاشىراعان ۇلتى قازاقتىڭ ءبارىن تايلى- تۇياعىمەن ۇلى دالا ەلىنە ورالۋعا شاقىرىپ، ءبىر شاڭىراق استىنا بىرىگۋگە ۇندەدى.

سول ءبىر سىندارلى شاقتا ەلباسى «الىستاعى اعايىنعا اق تىلەك» اتتى ايگىلى حاتىن جاريالاعانى بەلگىلى. قازاق كوشىن جانداندىرۋ ماقساتىندا «دۇنيەجۇزى قازاقتارى قاۋىمداستىعى» قۇرىلىپ، ەڭ العاشقى قۇرىلتاي 1992-جىلعى 28- قىرقۇيەك پەن 3- قازان ارالىعىندا الماتى قالاسىندا ءوتتى.

وسى قۇرىلتايدا سويلەگەن سوزىندە نۇرسۇلتان ءابىش ۇلى: «بۇل دۇنيەدە ءبىزدىڭ ءبىر عانا وتانىمىز بار، ول - تاۋەلسىز قازاقستان. ءبىز تۋعان مەملەكەتىمىزدىڭ تاۋەلسىزدىگىن باياندى ەتۋگە، قۋاتىن ارتتىرۋعا، ونىڭ يگىلىگىنە، حالىقارالىق قوعامداستىقتا ابىرويىنىڭ ارتۋىنا ادال قىزمەت ەتۋگە پارىزدارمىز»، ويتكەنى «بار قازاق - ءبىر قازاق» دەگەن جالىندى ءسوزىن ايتىپ، ميلليونداعان ەلدىڭ ەت-جۇرەگىن ەلجىرەتىپ، الاشقا اسقاق رۋح سىيلاعان ەدى.

ارتىنشا اتاجۇرتتى اڭساعان اعايىندار ەلگە اعىلا باستادى. ءتاۋ ەتكەن تاۋەلسىزدىك رۋحىمەن قاناتتانعان قانداستاردىڭ ۇلى كوشىنە دە بيىل 30 جىل تولىپ وتىر. ەندەشە، ەلباسى ۇندەۋىمەن تاريحي وتانىمەن قايتا قاۋىشقان قانداستار قاۋىمى اتىنان بارشا باۋىرلاردى قۇشاق جايا قارسى العان قازاق حالقىنا رياسىز ريزالىق ءبىلدىرىپ، شەكسىز العىس ايتقىمىز كەلەدى!

سونىمەن قاتار، بىلتىردان بەرى جاھاندى ىندەت جايلاپ، ادامزات اتاۋلىعا قاتەر تونگەن سىنداردى شاقتا شەت ەلدەردەگى وتانداستاردىڭ دا قالىڭ ەلى - قازاعىنا قايىرىمدىلىق جاساپ، جاناشىرلىق تانىتقان جاقسىلىعىن ايرىقشا اتاپ ايتقان ءجون. قاۋىپ ءالى دە سەيىلە قويعان جوق. وسىنداي كۇللىالەمدىك كۇردەلى جاعدايدا اتاجۇرتتاعى اعايىنىنىڭ اماندىعىن تىلەپ، گۋمانيتارلىق كومەكتەرىن جولداعان شەتتەگى جاناشىر وتانداستارىمىزعا دا كوپتەن كوپ راحمەت!

تاۋەلسىزدىكتەن باستاۋ العان ۇلى كوش ءالى تولاستاعان جوق. ءبىر كەزدەرى تاعدىر تالكەگىمەن شەكارا اسىپ، شەتەلگە اۋعان اعايىنداردىڭ اتامەكەنگە اعىلۋىنا - 1997-جىلدىڭ 13- جەلتوقسانىندا «حالىقتىڭ كوشى-قونى تۋرالى» زاڭعا قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان ءابىش ۇلى نازاربايەۆتىڭ قول قويۋى داڭعىل جول اشىپ بەردى. ناتيجەسىندە الەمنىڭ ءار تۇكپىرىندەگى تالاي قازاقتىڭ اتا قونىسقا دەگەن ساۋمال ساعىنىشى ۇزىلمەيتىن ۇمىتكە، سەلكەۋسىز سەنىمگە اينالدى.

اتا قونىسىمەن قاۋىشقان قانداستار وزدەرىمەن بىرگە قازاقتىڭ جوعالۋعا اينالعان كەيبىر سالت-داستۇرلەرى مەن ادەت-عۇرىپتارىن، ۇمىتىلا باستاعان كونە سوزدەرىن الا كەلدى دەسەك ارتىق ايتقاندىق ەمەس. شەتەلدە تۋىپ، ەگەمەندىكپەن بىرگە ەلىمىزگە ورالعان تالاي تانىمال تۇلعالار قازىر مەملەكەتىمىزدىڭ مەرەيىن اسىرىپ، قانداس ونەر جۇلدىزدارى مەن ساحنا ساڭلاقتارى قازاقتىڭ اتىن ايداي الەمگە ايگىلەپ ءجۇر. ال، ىسكەر باۋىرلار مەن كاسىپكەر قانداستار حالىققا قالتقىسىز قىزمەت ەتۋدە.

ەندەشە، ەلدىكتى ۇران، تاتۋلىقتى تۋ ەتكەن كوپۇلتتى قازاقستان حالقىنا مىڭ العىس!» دەگەن اقجارما تىلەگىمدى ارنايمىن.

ماعاۋيا سارباسوۆ

«وتانداستار قورى» ك ە ا ق

ۆيتسە-پرەزيدەنتى