تۇركىستانداعى وقيعا: ارنايى كوميسسيا قۇرىلدى

تۇركىستان. قازاقپارات - تۇركىستان قالاسىندا يىستەن ۋلانىپ قازا تاپقان وتباسىعا قاتىستى ارنايى كوميسسيا قۇرىلدى. وبلىس اكىمى ءومىرزاق شوكەيەۆتىڭ تاپسىرماسىمەن اتالعان وتباسىعا ماتەريالدىق كومەك كورسەتىلەتىن بولدى، دەپ حابارلايدى قازاقپارات ءتىلشىسى.

بۇگىن ايماق باسشىسۆ ءومىرزاق شوكەيەۆ پەن پوليتسيا دەپارتامەنتى جانە ت ج د باستىعى، تۇركىستان قالاسىنىڭ اكىمى وقيعا ورنىنا باردى. وبلىس اكىمى وقيعانىڭ تەرگەۋ بارىسىن جەكە باقىلاۋىنا الىپ، قازا بولعانداردىڭ تۋىستارى مەن جاقىندارىنا كوڭىل ايتتى. وتباسىنا ماتەريالدىق كومەك كورسەتۋدى تاپسىردى.

«زارداپ شەككەن وتباسىنا قاجەتتى پسيحولوگيالىق جانە ماتەريالدىق كومەك كورسەتىلەدى. ماسەلە مەنىڭ جەكە باقىلاۋىمدا. مەن قايتىس بولعان وتباسىنىڭ تۋىستارى مەن جاقىندارىنا شىن جۇرەكتەن كوڭىل ايتامىن»، - دەدى ءومىرزاق شوكەيەۆ.

توتەنشە جاعداي دەپارتامەنتىنە قالالار مەن اۋدانداردىڭ اكىمدىكتەرىمەن بىرلەسىپ، بارلىق جەردە جىلىتۋ جۇيەلەرىن تەكسەرۋدى جانە جىلىتۋ جۇيەلەرىمەن جۇمىس ىستەۋ كەزىندە قاۋىپسىزدىك شارالارىن ساقتاۋ بويىنشا اقپاراتتىق- ءتۇسىندىرۋ جۇمىستارىن كۇشەيتۋ تاپسىرىلدى.

قايعىلى وقيعانىڭ ءمان- جايىن انىقتاۋ ءۇشىن وبلىس اكىمىنىڭ ءبىرىنشى ورىنباسارى ارمان جەتپىسبايەۆتىڭ باسشىلىعىمەن ارنايى كوميسسيا قۇرىلدى.

ايتا كەتەيىك، قايعىلى جاعداي بۇگىن تۇركىستان قالاسىنداعى جەكە تۇرعىن ۇيدە 5 ادامنىڭ ءمايىتى تابىلعان ەدى. بەلگىلى بولعانداي كوز جۇمعاندار 1980 ج. ت اناسى مەن 2004، 2006، 2013، 2016 -جىلى تۋعان بالالارى ەكەنى انىقتالدى. بارلىعى ءيىس ءتيىپ قايتىس بولعان دەگەن بولجام جاسالدى. ال، وتاعاسى وقيعا بولعان كەزدە ەمدەلۋ ماقساتىندا شىمكەنت قالاسىندا بولعان.