نامانگاننان قوجا احمەت ياساۋي شەجىرەسىنىڭ ءبىر ۇلگىسى مەن ءمورى تابىلدى

نۇر- سۇلتان. قازاقپارات - وزبەكستان رەسپۋبليكاسىنىڭ نامانگان قالاسىنان تۇركى الەمىندە يسلام ءدىنىنىڭ كەڭ تارالۋىنا ەرەكشە لەپ بەرىپ، سوپىلىق نەگىزدەرىنىڭ ءدانىن ەككەن ايگىلى قوجا احمەت ياساۋي شەجىرەسىنىڭ ءبىر نۇسقاسى مەن يسلام الەمىنە ايگىلى ون ءبىر شايىقتىڭ ەسىمى جازىلعان ءمور تابىلدى.

اتالمىش جادىگەرلەر ق ر مادەنيەت جانە سپورت مينيسترلىگى، «ازىرەت سۇلتان» مەملەكەتتىك تاريحي- مادەني قورىق- مۋزەيى ۇيىمداستىرعان «ياساۋي ىزىمەن» عىلىمي- ەكسپەديتسياسى اياسىندا تابىلعان بولاتىن، دەپ حابارلايدى قازاقپارات ازىرەت سۇلتان مەملەكەتتىك تاريحي- مادەني قورىق- مۋزەىنىڭ رەسمي سايتىنا سىلتەمە جاساپ.

سايتتاعى مالىمەتتەرگە قاراعاندا، احمەت ءياساۋيدىڭ تاريحىنا قاتىستى قۇندى مۇرالار تۇراتىن ءياساۋيدىڭ ۇرپاعى، عۇلاما عالىم شاريفحۋجايەۆ يبراحيمجان قاجىنىڭ قولىندا ساقتالعان.

98 جاستاعى يبراحيمجان اقساقال تۇركىستان قالاسىنىڭ تۋماسى. احمەت ياساۋي كەسەنەسىنىڭ جانىندا ءومىر ءسۇرىپتى. ءدىني سەنىمدەرگە قارسى اتەيستىك كوزقاراس دەندەگەن كەزەڭدە تۇركىستان قالاسىنان دا كوپتەگەن تاقۋا جاندار قۋدالاۋعا ءتۇسىپ، كىتاپتارى ورتەلىپ، قيىن كەزەڭدەردى باستان وتكەرەدى. بۇل زوبالاڭ احمەت ياساۋي ۇرپاقتارىنا قاتتى سوققى بولعان. سول سەبەپتى اكەسىنەن ەرتە ايرىلعان يكرامجان قاريا 10 جاسىندا اناسى ەكەۋى باس ساۋعالاپ نامانگانعا تىعىلىپتى. اتا- بالالارىنان ۇرپاقتان- ۇرپاققا جەتكەن ناسابناما مەن ءموردى ساقتاپ قالۋ ءۇشىن نامانگان جەرىندە دە كوپ قيىندىقتار كورگەن.

«اكەم تۇركىستاندا جەرلەندى. ال انام نامانگاندا جاتىر. بىزگە بۇل جاقتا دا وڭاي بولعان جوق. اتادان بالاعا مۇرا بولىپ كەلە جاتقان اماناتتى ساقتاپ قالۋ انام ەكەۋمىزدىڭ باستى پارىزىمىز بولدى. قاراڭعىدا جاسىرىنىپ ءجۇرىپ، ارىق- اتىزدار مەن ەلەۋسىز جەرلەرگە كومدىك. جەر استىندا كوپ جاتقاندىقتان ناسابنامانىڭ كەيبىر جەرلەرىنىڭ بوياۋى وزگەرىپ، ءشىري باستادى. كوزىمنىڭ تىرىسىندە بۇل اماناتتى بابام جاتقان جەرگە تابىستاۋدى ارمانداپ جۇرگەن ەدىم» ، - دەدى يبراحيمجان قاجى.

نامانگاننان تابىلعان ناسابناما نۇسقاسى شاعاتاي تىلىندە جازىلعان. ۇزىندىعى- 2,5 مەتر. مۇرانىڭ قاي عاسىرعا جاتاتىنى ازىرگە بەلگىسىز. الداعى ۋاقىتتا «ازىرەت سۇلتان» مەملەكەتتىك تاريحي- مادەني قورىق- مۋزەيى تاراپىنان ناسابناما دا جازىلعان دەرەكتەرگە قاتىستى تولىققاندى عىلىمي- زەرتتەۋ جۇمىستارى جۇرگىزىلەتىن بولادى.

نامانگان عانا ەمەس بۇكىل رەسپۋبليكا جۇرتىنىڭ قۇرمەتىنە بولەنگەن عۇلاما عالىم يبراحيمجان اقساقالدىڭ سەگىز ۇل، ءۇش قىزىنان تاراعان ۇرپاق ۇلكەن اۋلەتكە اينالعان.

«ۇل- قىزدارىم قوجا احمەت ياساۋي ۇرپاقتارىنان بولعاندىعىن قۋانىشپەن ايتادى. ۇلكەن ۇلىم ءدىني ءىلىمدى مەڭگەرىپ، زەرتتەۋ جۇمىستارى بويىنشا مەنىڭ جولىمدى جالعاستىردى» ، - دەيدى قاريا.

يكرامجان قاجى ءوز ءۇيىنىڭ ءبىر بولمەسىنەن قوجا احمەت ياساۋي مەن تۇركىستانعا ارناپ شاعىن مۇراجاي اشىپتى. مۇراجايعا ءياساۋيدىڭ شەجىرەسىنە قاتىستى ناسابنامانىڭ كوشىرمەسى مەن ءمورىن جانە تۇركىستانعا قاتىستى سۋرەتتەر مەن كىتاپتار قويعان.

ەلباسى نۇرسۇلتان ءابىش ۇلى نازاربايەۆتىڭ «بولاشاققا باعدار: رۋحاني جاڭعىرۋ» ، «ۇلى دالانىڭ جەتى قىرى» باعدارلامالىق ماقالالارى اياسىندا

قوجا احمەت ياساۋيگە قاتىستى دەرەكتەر مەن مۇرالاردى جان- جاقتى زەرتتەۋ، ىزدەۋ، ۇرپاققا اماناتتاۋ ماقساتىندا قولعا الىنعان «ياساۋي ىزىمەن» عىلىمي- ەكسپەديتسيالىق جوباسى تاشكەنت قالاسىندا جالعاسادى.