چەحيادا بالالار اراسىندا كوروناۆيرۋستىڭ وڭتۇستىك- افريكالىق شتامى تارالىپ جاتىر

برنو. قازاقپارات - چەحيانىڭ شىعىس بولىگىنىڭ ءىرى قالاسى برنوداعى بالاباقشالاردىڭ بىرىنەن كوروناۆيرۋستىڭ وڭتۇستىك- افريكالىق شتاممىن جۇقتىرۋدىڭ ءۇش جاعدايى انىقتالدى، دەپ حابارلايدى قازاقپارات چەح تەلەارناسىنا سىلتەمە جاساپ.

كوروناۆيرۋستىڭ وڭتۇستىك- افريكالىق شتامى بالالار مەن جاسوسپىرىمدەرگە ۇلكەن قاۋىپ توندىرەدى. مەديتسينالىق ساراپشىلار بالاباقشالاردى جاۋىپ، ورتا مەكتەپتەردىڭ باستاۋىش سىنىپتارىندا وفلاين (كۇندىزگى) وقۋعا تىيىم سالۋ قاجەت دەپ سانايدى. ەل بيلىگى جۇما كۇنى ءتيىستى شەشىم قابىلدايدى دەپ كۇتىلۋدە.

ەل اۋرۋحانالارىندا 15 جاسقا دەيىنگى اۋرۋحاناعا جاتقىزىلعان ناۋقاستار سانى ارتىپ كەلەدى.

چەحيادا ىندەت باستالعاننان بەرى اۋرۋ جۇقتىرعانداردىڭ جالپى سانى 1212780 بولدى. ينفەكتسيانىڭ اسقىنۋىنان 10,46 ميلليون تۇرعىنى بار رەسپۋبليكانىڭ 19999 تۇرعىنى قايتىس بولدى. 5 قازاننان باستاپ رەسپۋبليكادا 2020 -جىلعى 12-ناۋرىز بەن 17-مامىر ارالىعىندا ارەكەت ەتكەن توتەنشە جاعداي رەجيمى قالپىنا كەلتىرىلدى. مۇندا ماسكالىق رەجيم جانە قاتاڭ الەۋمەتتىك شەكتەۋلەر، سونىڭ ىشىندە شۇعىل قاجەتتىلىكسىز تۇندە ۇيدەن شىعۋعا تىيىم سالىنعان.