جامبىل اتانىڭ جۇزگە جۋىق ۇرپاعى بار - سالتانات جامبىلوۆا

نۇر- سۇلتان. قازاقپارات - جامبىل جابايەۆتىڭ نەمەرەسى، اقىن مۋزەيىنىڭ مەڭگەرۋشىسى سالتانات جامبىلوۆا ەلورداداعى مەرەيتويدىڭ اشىلۋىنا كەلدى، دەپ حابارلايدى قازاقپارات ءتىلشىسى.

ەلوردادا ق. قۋانىشبايەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىندا جىر الىبى جامبىل جابايەۆتىڭ 175 جىلدىق مەرەيتويىن رەسمي تۇردە مەرەكەلەۋ باستالدى.

«بۇگىن ەلوردا تورىندە جامبىل اتامىزعا ۇلكەن قۇرمەت كورسەتىلىپ وتىر. وسى جيىنعا ءبىز دە قۇر الاقان كەلمەي، جامبىل اتامىزدىڭ ءوز اۋىلىنداعى مۋزەيىنەن جادىگەرلەر اكەلدىك. بۇل مۋزەي اتامىز تۇرعان ۇيدە اشىلعان، 92 جاسىندا ۇكىمەت اتامىزعا 12 بولمەلى ءۇي سالىپ بەرگەن ەكەن. ودان بولاشاقتا مۋزەي جاساۋ ماقساتى بولعان شىعار. اتامىز ول ۇيدە 8 -جىل تۇرىپ، 1945 -جىلى 22 -ماۋسىمدا قايتىس بولدى. 1946 -جىلى اتانىڭ ءجۇز جىلدىعى تويلانعاندا، ۇكىمەتتىڭ شەشىمىمەن ۇلكەن ءۇي مۋزەي اتاندى. بيىل اتامىزدىڭ 175 جىلدىعى بولسا، مۋزەيدىڭ قۇرىلعانىنا 75 جىل تولىپ وتىر»، - دەدى سالتانات جامبىلوۆا قازاقپارات تىلشىسىنە بەرگەن سۇحباتىندا.

جاڭا تەاتر فويەسىندە ۇيىمداستىرىلعان كورمەدە ۇلى اقىننىڭ تۇتىنعان جەكە زاتتارى، سىيلانعان سىي- سياپاتتارى مەن فوتوەستەلىكتەر قويىلعان.

«جامبىل اتامىزدىڭ ۇزاق عۇمىرىندا 3 رەت ۇيلەنگەن ەكەن. ءۇش اپامىز بولعان. ءبىراق قاتار ەمەس، ءبىرى قايتىس بولعان سوڭ، ەكىنشى رەت ۇيلەندى دەگەندەي. ءۇش ايەلدەن 8 ۇلى، 2 قىزى بولعان. ولاردىڭ كوبى ەرتەرەكتە قايتىس بولعان، العاداي مەن ىزتىلەۋ دەگەن ەكى ۇلى ۇلى وتان سوعىسىندا قازا تاپقان. مەنىڭ اكەم تەزەكباي - جامبىلدىڭ كىشى بالاسى، 1985 -جىلى قايتىس بولدى. قازىر 8 ۇل، 2 قىزدان جۇزگە جۋىق ۇرپاق تاراعان. نەمەرە، شوبەرە، شوپشەكتەرى قازاقستاننىڭ تۇپكىر- تۇپكىرىندە تۇرادى. ارينە كوپشىلىگى، ءبىز دە الماتى وبلىسى جامبىل اۋدانى جامبىل اۋىلىندا تۇرامىز»، - دەيدى س. جامبىلوۆا.

ونىڭ ايتۋىنشا، جامبىل مەرەيتويى بويىنشا رەسپۋبليكا كولەمىندە العاشقى جيىندار باستالدى.

«ءوزىمىز دە وبلىس كولەمىندە جوسپارلار قۇردىق. كوكشەتاۋداعى م. عابدۋللين مۋزەيىنە، نۇر- سۇلتانداعى اسەري قارۋ- جاراق ورتالىعىنا، اتىراۋ، جامبىل، قىزىلوردا وبلىستارىنا جىلجىمالى كورمە اپارۋ جوسپاردا بار. كورشىلەس قىرعىزستاندا جامبىل تويى قاڭتار ايىنىڭ سوڭىندا باستالىپ كەتتى. ناۋرىز ايىندا بۇرىنعى لەنينگراد، قازىرگى سانكت- پەتەربۋرگ قالاسىمەن تەلەكوپىرگە شىعامىز. وندا دا جامبىل اتىنداعى كوشە مەن ەسكەرتكىش بار»، - دەيدى سالتانات جامبىلوۆا.

اۆتور: ايجان سەرىكجان قىزى