ماس كۇيىندە سىبايلاس جەمقورلىققا قارسى قىزمەت كۋالىگىن كورسەتكەن ادام انىقتالدى - اگەنتتىك

نۇر- سۇلتان. قازاقپارات – ق ر سىبايلاس جەمقورلىققا قارسى ءىس- قيمىل اگەنتتىگىنىڭ اعا وفيتسەرى دينارا قۇلىمبەتوۆا ۆيدەودا ماس كۇيىندە سىبايلاس جەمقورلىققا قارسى قىزمەت قىزمەتكەرىنىڭ كۋالىگىن كورسەتكەن ەر ادامعا قاتىستى تۇسىنىك بەردى، دەپ حابارلايدى قازاقپارات ءتىلشىسى.

«جول- كولىك وقيعاسىن جاساعاننان كەيىن، ماس كۇيىندەگى ەر ادام سىبايلاس جەمقورلىققا قارسى قىزمەت قىزمەتكەرىنىڭ كۋالىگىن كورسەتكەنى جايىندا الەۋمەتتىك جەلىلەردە تاراعان بەينەتۇسىرىلىم ۇلكەن قوعامدىق رەزونانس تۋدىردى. جەدەل ىزدەستىرۋ ءىس- شارالارى بارىسىندا بۇرىن اۋىر قىلمىس جاساعانى ءۇشىن جانە ىشكى ىستەر ورگاندارىندا ىزدەستىرىلىپ جاتقان ابدۋللايەۆ ۇستالدى. ونىڭ جالعان قىزمەتتىك كۋالىگى انىقتالدى»، - دەدى د. قۇلىمبەتوۆا ونلاين رەجيمدە وتكەن بريفينگىدە.

ونىڭ ايتۋىنشا، اتالعان جالعان قىزمەتتىك كۋالىك سىبايلاس جەمقورلىققا قارسى قىزمەتتىڭ ۇلگىسىندەگى قۇجات نەگىزدە جاسالماعانىن ناقتىلادى.

سونداي - اق، ءوزىن سىبايلاس جەمقورلىققا قارسى قىزمەتتىڭ وكىلى دەپ تانىستىرعان ءبىرقاتار الاياق ۇستالدى.

«2020 -جىلى جەكە قاۋىپسىزدىك دەپارتامەنتى لاۋازىمدى تۇلعالاردىڭ ءىس- ارەكەتتەرىنە قاتىستى 406 شاعىم مەن ءوتىنىشتى قارادى، 286 قىزمەتتىك تەرگەۋ جۇرگىزدى. وسىعان وراي سىبايلاس جەمقورلىققا قارسى قىزمەت قىزمەتكەرلەرىنىڭ جۇمىس بابىن پايدا كورۋ ماقساتىندا پايدالانۋعا جول بەرمەۋ بويىنشا ءىس- شارانى تۇراقتى نەگىزدە جۇرگىزىپ كەلەدى. سونىمەن قاتار، وزدەرىن سىبايلاس جەمقورلىققا قارسى قىزمەتكەرى اتىنان تانىستىراتىن ادامداردىڭ الاياقتىق ارەكەتتەر جاساۋ فاكتىلەرى ورىن الىپ وتىر»، - دەدى د. قۇلىمبەتوۆا ونلاين رەجيمدە وتكەن بريفينگىدە.

اۆتور: رۋسلان عابباسوۆ