ارىستا وقۋشىلارعا ارنالعان اسكەري سايىس جاپپاي توبەلەسپەن اياقتالدى

نۇر-سۇلتان. قازاقپارات - ارىستا اسكەري سايىس جاپپاي توبەلەسپەن اياقتالدى، - دەپ حابارلايدى «ك ت ك» تەلەارناسى.

تەلەارنا مالىمەتىنشە، وقۋشىلار ءادىلقازىلاردىڭ شەشىمىنە قارسى بولعان. سايىستى سالتاناتتى تۇردە قورىتىندىلاۋ كەزىندە مادەنيەت ۇيىنە جينالعان وقۋشىلار توبەلەس شىعارعان. اشۋعا بۋلىققانداردى سىرتقا شىعارعانىمەن، توبەلەس دالادا دا جالعاسقان. جاراقات العاندار جوق.

سوعان قاراماستان پوليتسەيلەر وقۋشىلاردى تەرگەپ جاتىر. ال كارانتين تالابىن بۇزعانى ءۇشىن شارا ۇيىمداستىرۋشىلارى اكىمشىلىك جازاعا تارتىلعان.

«ىزدەستىرۋ جۇمىسىن جۇرگىزگەندە بۇزاقىلىق دەرەگىنە قاتىستى جەرگىلىكتى تۇرعىندار انىقتالدى. بارلىعى جىگىتتەر. وقۋ بولىمدەرىنىڭ وقۋشىلارى. ولارعا قاتىستى تەرگەۋ جۇرگىزىلىپ جاتىر. بولعان وقيعانىڭ ءمان-جايى انىقتالىپ جاتىر»، - دەيدى تۇركىستان وبلىسى پ د باسپا ءسوز حاتشىسى سالتانات قاراكوزوۆا.