شەتەلدىكتەرگە جەر ساتۋعا تىيىم سالۋ نورماسى قالاي قابىلدانادى

نۇر-سۇلتان. قازاقپارات - پرەزيدەنت شەتەلدىكتەرگە جەر ساتۋعا تىيىم سالۋ تۋرالى نورمانى زاڭداستىرۋدى تاپسىردى.

بۇل تۋرالى ق ر پرەزيدەنتىنىڭ كومەكشىسى ەرلان قارين Telegram جەلىسىندە جازدى، دەپ حابارلايدى قازاقپارات.

«بۇگىن ۇلتتىق كەڭەس وتىرىسىندا پرەزيدەنتتىڭ باستى باستامالارىنىڭ ءبىرى - بارلىق قازاقستاندىقتاردى تولعاندىراتىن جەر ماسەلەسىنە قاتىستى بولدى. مەملەكەت باسشىسى بۇل جونىندە بىرنەشە رەت پىكىر بىلدىرگەن بولاتىن. ونىڭ ناقتى جانە پرينسيپتى ۇستانىمى بار: «ءبىزدىڭ جەرىمىز شەتەلدىكتەرگە ساتىلمايدى». وسىعان بايلانىستى پرەزيدەنت شەتەلدىكتەر مەن شەتەلدىك زاڭدى تۇلعالارعا اۋىل شارۋاشىلىعى جەرلەرىن ساتۋعا جانە جالعا بەرۋگە تىيىم سالۋدى زاڭداستىرۋدى تاپسىردى. وسىلايشا، مەملەكەت باسشىسى بۇل ماسەلەگە تۇبەگەيلى نۇكتە قويدى»، - دەپ جازدى ەرلان قارين Telegram جەلىسىندە.

ول ءۇشىن پرەزيدەنتتىڭ زاڭ شىعارۋ باستاماسى تارتىبىمەن پرەزيدەنت اكىمشىلىگى ءتيىستى زاڭ جوباسىن ازىرلەيدى. پرەزيدەنت بۇل قۇجاتتى ءوز وكىلەتتىكتەرى اياسىندا ازىرلەۋدى باستاما ەتە وتىرىپ، وسى نورمانى زاڭنامالىق راسىمدەۋ بويىنشا ءوز كوزقاراسىن كورسەتەدى. اتاپ وتكەن ءجون، قولدانىستاعى نورمالارعا سايكەس زاڭ جوباسىنا 3 تاسىلمەن باستاماشىلىق جاسالۋى مۇمكىن: ۇكىمەتتىڭ زاڭ شىعارۋ باستاماسى بويىنشا، پارلامەنت دەپۋتاتتارىنىڭ باستاماسى بويىنشا جانە پرەزيدەنتتىڭ باستاماسى بويىنشا.

«ءاربىر جاعدايدا ءتيىستى ماقۇلداۋ پروتسەدۋراسى بار. پرەزيدەنتتىك باستاما اياسىندا زاڭ جوباسىن ازىرلەۋ قىسقا مەرزىمدە شەتەلدىكتەرگە جەردى ساتۋ جانە جالعا بەرۋگە تىيىم سالۋدى زاڭنامالىق راسىمدەۋگە مۇمكىندىك بەرەدى. وسىلايشا، جەر پىكىرتالاسىنداعى ەڭ ماڭىزدى ماسەلە جابىق دەپ سەنىمدى تۇردە ايتۋعا بولادى. اۋىل شارۋاشىلىعى جەرلەرىن پايدالانۋ بويىنشا قالعان ماسەلەلەر جەر كوميسسياسى اياسىندا جۇمىس تارتىبىمەن قارالۋى ءتيىس، ونىڭ قۇرامى ءبىر اي ىشىندە انىقتالىپ، ناۋرىز ايىنىڭ سوڭىندا جۇمىس ىستەي باستايدى»، - دەيدى ەرلان قارين.

ەسكە سالساق، ۇلتتىق كەڭەستىڭ بەسىنشى وتىرىسى ءوتىپ جاتىر. ۇلتتىق قوعامدىق سەنىم كەڭەسى قۇرامىندا روتاتسيا جاسالدى. جاڭارتىلعان ءماجىلىس قۇرامىندا ۇلتتىق كەڭەستىڭ 9 مۇشەسى بار. وتكەن جىلى 22-قازاندا ق ر پرەزيدەنتى قاسىم-جومارت توقايەۆتىڭ قاتىسۋىمەن ۇلتتىق قوعامدىق سەنىم كەڭەسىنىڭ ءتورتىنشى وتىرىسى، ال 2019 -جىلى 6-قىركۇيەكتە العاشقى وتىرىسى بولدى.

اۆتور: ايجان سەرىكجان قىزى