ق ر پرەزيدەنتى جاستار اراسىندا لۋدومانيا بەلەڭ العانىنا الاڭداۋشىلىق تانىتتى

نۇر-سۇلتان. قازاقپارات - جاستار اراسىندا قۇمار ويىندارعا تاۋەلدىلىك بەلەڭ الۋدا.

بۇل تۋرالى ۇلتتىق قوعامدىق سەنىم كەڭەسىنىڭ 5-وتىرىسىندا ق ر پرەزيدەنتى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.

«وسكەلەڭ ۇرپاقتىڭ دەنساۋلىعىنا الەۋمەتتىك كەسەلدەر زالالىن تيگىزەدى. شىلىم شەگۋگە، ىشىمدىككە جانە ەسىرتكىگە تاۋەلدى بولۋ كەڭىنەن تارالعان جاعىمسىز ادەتتەر. بۇعان قوسا، سوڭعى كەزدە جاستار اراسىندا لۋدومانيا، ياعني قۇمار ويىندارعا تاۋەلدىلىك بەلەڭ الۋدا. بۇل كەسەلدەن قۇمارپازداردىڭ وزدەرى عانا ەمەس، ولاردىڭ وتباسى، تۋىستارى مەن جاقىندارى زارداپ شەگەدى. جاسوپىرىمدەرىمىز زاماناۋي تەحنولوگيالاردىڭ ىقپالىمەن قۇمار ويىندارىنا وڭاي شىرمالاتىن بولدى»، - دەدى قازاقستان پرەزيدەنتى.

مەملەكەت باسشىسى بۋكمەكەرلەر مەن كازينولار ينتەرنەتتە تولاسسىز جارناما جاساپ، جۇرتتى ەرىكسىز ەلىتىپ وتىرعاندىعىن باسا ايتتى.

«مەملەكەت بۇعان شەكتەۋ قويۋ ءۇشىن ءبىرقاتار ماڭىزدى شارا قابىلدادى. ءبىراق، بۇل شارالار ارينە، جەتكىلىكسىز. جاس ۇرپاقتى قۇمار ويىننىڭ زياندى ىقپالىنان جان-جاقتى قورعاۋىمىز كەرەك. ماسەلەنى شەشۋ ءۇشىن جاڭا تاسىلدەردى قولدانۋ قاجەت»، - دەدى قاسىم-جومارت توقايەۆ.