قازاقستاننىڭ ابىرويىن اسقاقتاتقان وليمپيادا چەمپيوندارى
ەل نامىسىن قورعاعان سپورتشىلار جايىندا قازاقپارات ءتىلشىسى ايتىپ بەرەدى.
ەلىمىزدىڭ تاۋەلسىزدىك العانىنا بيىل 30 جىل تولدى. وسى ۋاقىت ارالىعىندا قازاقستان سپورتشىلارى جازعى جانە قىسقى وليمپيادا ويىندارىنا قاتىسىپ كەلەدى.
ايتا كەتەيىك، 1988-جىلعا دەيىن قازاق سپورتشىلارى ك س ر و قۇراماسىنىڭ قاتارىندا ونەر كورسەتتى. ال 1992-جىلعى جازعى وليمپيادا ويىندارىندا ەلىمىز تاۋەلسىزدىگىن جاريالاعانىمەن، سپورتشىلارىمىز بىرىككەن كوماندا قۇرامىنا ەندى. ءوزى جەكە ەل رەتىندە قاتىسۋدى تۇڭعىش رەت 1994-جىلى نورۆەگيانىڭ ليللەحاممەر قالاسىندا وتكەن XVII قىسقى وليمپياداسىنان باستادى.
بۇل بايراقتى باسەكەگە 67 مەملەكەتتەن 1737 سپورتشى قاتىستى. ولار سپورتتىڭ 12 ءتۇرى بويىنشا 61 جۇلدە جيىنتىعىن ساراپقا سالدى.
ليللەحاممەردە قازاقستاننىڭ تۋى استىندا 29 سپورتشى ونەر كورسەتتى. سول جارىستا شاڭعىشى ۆلاديمير سميرنوۆ قانا جەڭىس تۇعىرىنا كوتەرىلدى. ول ەرلەر اراسىنداعى 50 شاقىرىمدىق جارىستا مارە سىزىعىن ءبىرىنشى بولىپ قيدى.
بۇل - تاۋەلسىز قازاقستاننىڭ تاريحىنداعى وليمپيادا ويىندارىنىڭ ءبىرىنشى جۇلدەسى، ازاتتىقتىڭ العاشقى التىنى ەدى.
كەلەسى وليمپيادا ويىندارى ەكى جىلدان كەيىن، 1996-جىلى امەريكانىڭ اتلانتا قالاسىندا ءوتتى. جازعى وليمپيادا ويىندارىندا قازاقستاندىق سپورتشىلار 11 مەدالدى جەڭىپ الدى. 3 وتانداسىمىز چەمپيون اتانىپ، جەڭىس تۇعىرىنىڭ ەڭ بيىك ساتىسىنا كوتەرىلدى.
ولار: ۆاسيلي جيروۆ - 81 كەلىگە دەيىنگى سالماقتا جۇدىرىقتاسقان بوكسشى. وليمپيادا ناتيجەسى بويىنشا ۆەل باركەر كۋبوگىنا قول جەتكىزگەن العاشقى وتانداسىمىز. يۋري مەلنيچەنكو - گرەك-ريم كۇرەسىنەن 57 كەلى سالماقتا ونەر كورسەتىپ، جەڭىمپاز اتاندى. الەكساندر پارىگين بەسسايىستان وليمپيادا چەمپيونى بولدى. بوكسشى بولات جۇمادىلوۆكە (51 كەلىگە دەيىن سالماقتا)، نىسانا كوزدەۋدەن سەرگەي بەليايەۆكە، اۋىر اتلەت اناتولي حراپاتىيعا كۇمىس بۇيىردى.
قولا مەدالىن بىلعارى قولعاپ شەبەرلەرى بولات نيازىمبەتوۆ (63,5 كەلىگە دەيىن)، ەرماحان ىبرايىموۆ ەنشىلەدى. سونداي-اق نىسانا كوزدەۋدەن ۆلاديمير ۆوحميانين مەن ەركىن كۇرەستەن ماۋلەن مامىروۆ الدى.
1998-جىلى شاڭعىشى ۆلاديمير سميرنوۆ ناگانوداعى (جاپونيا) قىسقى وليمپيادا ويىندارىندا تاعى دا ەرەكشەلەندى. 15 شاقىرىمعا ەركىن ستيلمەن جۇگىرۋدە ول مارە سىزىعىنا ءۇشىنشى بولىپ كەلىپ قولا الدى. ەكىنشى قولا مەدالىن قازاقستانعا كونكيمەن جۇگىرۋشى ليۋدميلا پروكاشيەۆا اكەلدى.
سيدنەي وليمپياداسى - 2000-جىل
سيدنەيدەن دە (اۆستراليا) جەرلەستەرىمىز 3 التىن، 4 كۇمىس مەدالمەن ورالدى. بەكزات ساتتارحانوۆ - وليمپيادا چەمپيونى، 57 كەلىگە دەيىنگى سالماقتا ونەر كورسەتتى. ەرماحان ىبرايىموۆ - 71 كەلىدە بوكستاستى. ولگا شيشيگينا - كەدەرگىلەرمەن 100 م قاشىقتىققا جۇگىرۋ بويىنشا جەڭىمپاز اتاندى.
ال، بوكسشىلار بولات ءجۇمادىلوۆ (51 كەلىگە دەيىن) جانە مۇحتارحان دىلدابەكوۆ (+91 كەلى) جانە ەركىن كۇرەستەن يسلام بايرامۋكوۆ پەن ۆەلوشاباندوز الەكساندر ۆينوكۋروۆ كۇمىس الدى.
2002-جىلى سولت-لەيك-سيتيدە (ا ق ش) جانە 2006-جىلى يتاليادا وتكەن قىسقى وليمپيادا ويىندارىندا قازاقستاندىقتار مەدالسىز قالدى.
2004-جىلعى افينى وليمپياداسىندا 119 قازاقستاندىق 17 سپورت تۇرىنەن ونەر كورسەتتى. تەك جالعىز سپورتشىمىز عانا جەڭىس تۇعىرىنىڭ ەڭ بيىك ساتىسىنا كوتەرىلدى. ول - 69 كەلى سالماقتا ونەر كورسەتكەن باحتيار ارتايەۆ. ول سونداي-اق وليمپيادا چەمپيونى اتاعىمەن قوسا، ۆەل باركەر كۋبوگىن دا جەڭىپ الدى.
وسىلايشا ۆەل باركەر كۋبوگىن يەلەنگەن ەكىنشى قازاقستاندىق بوكسشى اتاندى. تاعى ءتورت سپورتشى كۇمىس الدى: بوكسشى گەننادي گولوۆكين، اۋىر اتلەت سەرگەي فيليمونوۆ، بالۋاندار گەورگي تسۋرتسۋميا جانە گەنناديي لاليەۆ. جەڭىل اتلەت دميتري كارپوۆ، بوكسشى سەرىك ەلەۋوۆ جانە گرەك-ريم كۇرەسىنەن محيتار مانۋكيان قولا الدى.
ناتيجەسىندە قازاقستان قورجىنىنا سەگىز مەدال سالىندى.
بەيجىڭ وليمپياداسى - 2008 -جىل
بەيجىڭدە 2 وتانداسىمىز جەڭىس تۇعىرىنان قول بۇلعادى. ونىڭ ءبىرى 69 كەلى سالماقتا جۇدىرىقتاسقان بوكسشىمىز باقىت سارسەكبايەۆ بولسا، ەكىنشىسى اۋىر اتلەتيكادان 94 كەلى سالماقتا سىنعا تۇسكەن سپورتشىمىز يليا يلين بولاتىن. الايدا، كەيىن يليننىڭ جەڭىسىن حالىقارالىق وليمپيادا كوميتەتى دوپينگ قولداندى دەپ قايتاردى. كۇمىس مەدالدى دزيۋدوشى اسحات جىتكەيەۆ (100 كەلىگە دەيىن)، جەڭىل اتلەت ولگا رىپاكوۆا جانە گرەك-ريم كۇرەسىنىڭ بالۋانى نۇرباقىت تەڭىزبايەۆ (60 كەلىگە دەيىن) جەڭىپ الدى.
باستاپقىدا ەكەۋى دە قولا جۇلدەگەر بولعان، كەيىننەن قارسىلاستارىنىڭ دوپينگ قولدانعاندارى بەلگىلى بولىپ، ولار كۇمىسكە يە بولدى. گرەك-ريم كۇرەسىنىڭ بالۋانى ەلەنا شالىگينا، ەركىن كۇرەستەن ماريد مۋتاليموۆ، بوكسشى ەركەبۇلان شىناليەۆ جانە تاەكۆوندوشى ارمان چيلمانوۆ قولا جۇلدەنى ەنشىلەدى.
لوندون وليمپياداسى - 2012-جىل
لوندون وليمپياداسى تاۋەلسىز قازاقستان تاريحىنا التىن ارىپتەرمەن جازىلعان ەدى. وندا قازاقستاندىق سپورتشىلار 7 التىندى قورجىنعا سالدى. الايدا، حالىقارالىق وليمپيادا كوميتەتى تاعى دا دوپينگ داۋىمەن 4 سپورتشىمىزدى مەدالىنەن ايىردى. ولاردىڭ ىشىندە ءوز اتاقتارىن ءۇش اتلەتىمىز ساقتاپ قالدى. ولار: ۆەلوشاباندوزىمىز الەكساندر ۆينوكۋروۆ، ءۇش قارعىپ سەكىرۋ سايىسىنان ولگا رىپاكوۆا جانە داڭقتى بوكسشىمىز سەرىك ساپيەۆ.
وسى ورايدا ايتا كەتەيىك، سەرىك چەمپيوندىق اتاقپەن بىرگە ۆەل باركەر كۋبوگىنا يە بولعان قازاق جەرىنەن شىققان ءۇشىنشى سپورتشى اتاندى. ال، اۋىر اتلەتيكادان زۋلفيا چينشانلو (53 كەلى)، مايا مانەزا (63 كەلى)، سۆەتلانا پودوبەدوۆا ( 75 كەلى) جانە بەيجىڭدە دە چەمپيون اتانعان داڭقتى اۋىر اتلەتىمىز يليا يليننىڭ (94 كەلى) چەمپيوندىق اتاقتارى كۇشىن جويدى. بۇعان باستى سەبەپ - دوپينگ داۋى.
قازاقستان قۇراماسى ءۇشىن سوچيدەگى XXII قىسقى وليمپيادا ويىندارى ايتارلىقتاي ءساتتى بولمادى. بۇل وليمپيادا دا جەڭىس تۇعىرىنا مانەرلەپ سىرعاناۋشى دەنيس تەن عانا شىقتى. ول قولا مەدال ولجالادى.
ريو وليمپياداسى - 2016-جىل
قازاقستاننان الەمدىك باسەكەگە 26 سپورت تۇرىنەن 104 سپورتشى قاتىسىپ، باق سىنادى. قازاقستاندىقتار بارلىعى 17 مەدال (3 التىن، 5 كۇمىس، 9 قولا) الىپ، ەل سپورتى تاريحىندا كۇمىس جانە جالپى جۇلدەلەر سانى جونىنەن رەكوردتىق كورسەتكىشكە قول جەتكىزدى. التىنى ازداۋ دەمەسەك، ءتورت جىلدا ءبىر كەلەتىن دۇنيەجۇزىلىك دودادا ەل قورجىنىنا تۇسكەن بۇل جۇلدەلەردىڭ ءباسى جوعارى.
التىن مەدالدى نيجات راحيموۆ (اۋىر اتلەتيكا)، دميتري بالاندين (ءجۇزۋ سپورتى)، دانيار ەلەۋسىنوۆ (بوكس) جەڭىپ الدى.
2018-جىلى وڭتۇستىك كورەيانىڭ پحەنچحان قالاسىنداعى XIII قىسقى وليمپيادا ويىندارىندا قازاقستاننىڭ نامىسىن سپورتتىڭ ءتورت تۇرىنەن 44 سپورتشى قورعادى. ءبىراق سوڭىندا ءبىر عانا قولا مەدال بۇيىردى.
توكيوداعى 2020-جىلعى جازعى وليمپيادا ويىندارى كوروناۆيرۋس پاندەمياسىنا بايلانىستى 2021-جىلدىڭ جازىنا اۋىستىرىلدى.