كوروناۆيرۋس بويىنشا الەمدەگى جاعداي

نۇر-سۇلتان. قازاقپارات - دۇنيەجۇزىلىك دەنساۋلىق ساقتاۋ ۇيىمى كوروناۆيرۋستىڭ الەمدە تارالۋ قارقىنى تومەندەپ جاتقانىن، الايدا ىندەتتىڭ جاڭا شتامدارىنىڭ پايدا بولۋى الاڭداۋشىلىق تۋعىزىپ وتىرعانىن مالىمدەدى.

سارسەنبىدە Covax حالىقارالىق باعدارلاماسى ىسكە قوسىلدى، ونىڭ اياسىندا ەڭ كەدەي مەملەكەتتەر ۆاكتسينا الا باستايدى. سونىمەن ءبىر مەزەتتە گرۋزيا تۋريستەردىڭ كىرۋىنە شەكتەۋلەر مەن باسقا دا كارانتين شەكتەۋلەرىن الىپ تاستاۋدا.

الەمدەگى وسى جانە وزگە دە جاڭالىقتار جونىندە قازاقپارات BBC سايتىنا سىلتەمە جاساپ حابارلايدى.

د د ۇ- نىڭ «ساق» وپتيميزمى

دۇنيەجۇزىلىك دەنساۋلىق ساقتاۋ ۇيىمى 6-اپتا قاتارىنان الەمدە كوروناۆيرۋستىڭ جاڭا جاعدايلارى مەن ءولىم-ءجىتىمنىڭ تومەندەپ كەلە جاتقانىنا وپتيميزم تانىتتى.

د د س ۇ مالىمەتتەرى بويىنشا، وتكەن اپتادا ينفەكتسيانىڭ 2,4 ميلليون جاڭا جاعدايى تىركەلدى، بۇل الدىڭعى اپتامەن سالىستىرعاندا %11 از. سول كەزەڭدە COVID-19 ءولىمىنىڭ دەڭگەيىن %20 تومەندەدى. الايدا اۋرۋ قارقىنى باسەڭدەگەنىمەن، دارىگەرلەر جاڭا شتامداردى جۇقتىرۋدىڭ كوبەيۋىنە الاڭداۋلى.

پاندەميا باستالعاننان بەرى الەمدە 110,7 ميلليون ادام ىندەتتى جۇقتىرىپ، 2,4 ميلليوننان استامى قازا بولدى.

Covax-قا ءۇمىت ارتىلدى

گانا الەمدەگى ەڭ كەدەي ەلدەردىڭ تۇرعىندارىن ۆاكتسينالاۋعا ارنالعان «Covax» باعدارلاماسى اياسىندا كوروناۆيرۋستىڭ ۆاكتسينالار پارتياسىن العان العاشقى ەل بولدى. ءۇندىستاندا وندىرىلگەن AstraZeneca پرەپاراتىنىڭ 600 مىڭ دوزاسىنىڭ پارتياسى سارسەنبىدە اككراعا جەتكىزىلدى.

گانادا (ەل حالقى 30 ميلليون) پاندەميا باستالعاننان بەرى كوروناۆيرۋس ينفەكتسياسىنىڭ 80 مىڭنان استام جاعدايى جانە 580 ءولىم تىركەلدى. ءبىراق تەستىلەۋ پروبلەمالارىنا بايلانىستى بۇل ساندار تولىق بولماۋى مۇمكىن.

ءبىر عانا ەكپە جەتكىلىكتى…

امەريكالىق رەتتەۋشىلەر قاۋىپسىز، كوروناۆيرۋس اۋرۋىنىڭ الدىن الاتىن جانە قايتا ەگىلۋدى قاجەت ەتپەيتىن Johnson Johnson شىعارعان Covid-19 ۆاكتسيناسىن ماقۇلداۋعا دايىن. ساراپشىلاردىڭ پىكىرىنشە، جاڭا ۆاكتسينا Pfizer جانە Moderna پرەپاراتتارىنا بيۋدجەتتىك بالاما بولا الادى.

ويتكەنى ولاردان ايىرماشىلىعى - ونى ارنايى توڭازىتقىشتا ەمەس، قاراپايىم توڭازىتقىشتا ساقتاۋعا بولادى.

ا ق ش، وڭتۇستىك افريكا جانە برازيلياداعى الدىن الا كلينيكالىق زەرتتەۋلەر كورسەتكەندەي، جاڭا ۆاكتسينا %85 استام اۋىر جاعدايلاردىڭ الدىن الادى. ءبىراق كوروناۆيرۋستىڭ ورتاشا جانە جەڭىل ءتۇرى ءۇشىن ونىڭ تيىمدىلىگى %66 اسپايدى. سونىمەن قاتار سىناققا قاتىسقانداردىڭ ەشبىرى ۆاكتسيناتسيادان كەيىنگى 28 كۇن ىشىندە قايتىس بولماعان جانە اۋرۋحاناعا تۇسپەگەن.

بۇعان دەيىن Johnson and Johnson ولاردىڭ ۆاكتسيناسى ماقۇلدانعان جاعدايدا بىردەن 4 ميلليوننان استام دوزانى شىعارىپ، ناۋرىز ايىنىڭ سوڭىندا 20 ميلليوندى قامتاماسىز ەتە الاتىندىعىن مالىمدەدى.

ۇلى بريتانيا: مەكتەپ وقۋشىلارىنا دەمالىس بولماي ما؟

ۇلى بريتانيا پرەمەر-ءمينيسترى بوريس دجونسون جوعارى سىنىپ وقۋشىلارى جازدا قايتا وقىپ، مۇعالىمدەرىمەن جەكە جۇمىس ىستەۋى ءۇشىن قوسىمشا قاراجات بولۋگە ۋادە بەردى. وتكەن جىلدىڭ ناۋرىز ايىندا ەنگىزىلگەن ەلەۋلى شەكتەۋلەر مەكتەپ وقۋشىلارىن قاشىقتان وقىتۋعا كوشۋگە ءماجبۇر ەتكەندىكتەن، بۇل ولاردىڭ ۇلگەرىمىنە دە اسەر ەتتى.

وسىعان ۇقساس باستامالار شوتلانديا، ۋەلس جانە سولتۇستىك يرلانديادا ىسكە اسىرىلۋى مۇمكىن. ولاردىڭ بيلىگى مەكتەپتەرگە قوسىمشا قارجى ءبولۋدى جوسپارلاۋدا.

گرۋزيا شەكارانى اشادى

25- اقپاننان باستاپ گرۋزيا كوروناۆيرۋس پاندەمياسىنا بايلانىستى شەكتەۋلەردى بىرتىندەپ الىپ تاستاي باستايدى. 1- ناۋرىزدان باستاپ رەسەي، ارمەنيا، ازەربايجان، بەلارۋس، ۋكراينا جانە قازاقستان ازاماتتارى كوروناۆيرۋسقا تەرىس تەست تاپسىرعان جاعدايدا ەلگە ۇشىپ كەلە الادى. بۇعان دەيىن ەلگە كىرۋ تەك ەۋرووداق مەملەكەتتەرىنىڭ ازاماتتارى ءۇشىن رۇقسات ەتىلگەن بولاتىن.

گرۋزياداعى تاۋ شاڭعىسى كۋرورتتارىندا الدىمەن قوناقۇيلەر، ال 8- ناۋرىزدان باستاپ تاۋعا كوتەرگىشتەر اشىلادى. سودان كەيىن مەيرامحانالار، ساۋدا ورتالىقتارى مەن بازارلار قايتادان جۇمىس ىستەي باستايدى (تەك دەمالىس كۇندەرى جۇمىس ىستەۋگە رۇقسات ەتىلگەن ازىق-تۇلىك دۇكەندەرىنەن باسقا).

15- ناۋرىزدا جوعارى وقۋ ورىندارى مەن جاتتىعۋ زالدارىن اشۋ جوسپارلانۋدا، ال 1- ساۋىردەن باستاپ تەاترلار، سپورت كلۋبتارى مەن سپورت ارەنالارى جۇمىس ىستەي باستايدى. سونىمەن قاتار كەشكى 9 دان تاڭعى 5 كە دەيىن قوزعالىسقا تىيىم ءالى دە كۇشىندە قالادى.