تۇركيادا قازاقتىڭ تۇلعالارىن ناسيحاتتاعاندار ق ر پرەزيدەنتىنىڭ العىس حاتىمەن ماراپاتتالدى

None
None
انكارا. قازاقپارات - «اباي، ءال- فارابي جانە جامبىل» - وسىنداي اتاۋمەن انكارادا بەلگىلى تۇلعالاردىڭ رۋحاني مۇراسى مەن تۋىندىلارىن ناسيحاتتاۋعا ارنالعان جيىن ءوتتى، دەپ حابارلايدى قازاقپارات «حابار 24» تەلەارناسىنا سىلتەمە جاساپ.

ءىس- شارادا ابايدىڭ 175 جانە ءال-فارابيدىڭ 1150 جىلدىعىنا ارنالعان شارالار قورىتىندىلانىپ، تۇركيادا مەرەيتويعا اتسالىسقان ساياساتكەرلەر، قوعامدىق قايراتكەرلەر مەن كورنەكتى وكىلدەر ماراپاتتالدى. ولارعا قازاقستان پرەزيدەنتى قاسىم-جومارت توقايەۆتىڭ العىس حاتى تابىستالدى.


حالىقارالىق تۇركى اكادەمياسى، قازاقستان ەلشىلىگى مەن ەۋرازيا جازۋشىلار وداعىنىڭ ۇيىتقىسىمەن وتكەن شارادا مىرزاتاي جولداسبەكوۆتىڭ «دالا ادەبيەتىنىڭ ۇلى اقىنى جامبىل» كىتابىنىڭ تۇرىك تىلىنە اۋدارىلعان نۇسقاسىنىڭ تۇساۋكەسەرى ءوتتى.


تۇرىك وقىرمانىنا جول تارتقان تۋىندى، ءدۇلدۇل اقىننىڭ 175 جىلدىعىنا تارتۋ. العىس حاتقا يە بولعاندار باۋىرلاس ەلدەر اراسىنداعى ىنتىماقتىڭ نىعايۋىنا قىزمەت ەتەتىنىن ايتتى.


«قازاق جۇرتىنا جانە قازاقستان پرەزيدەنتىنە ۇسىنعان ماراپاتى ءۇشىن العىس ايتامىن. تۇركيا پارلامەنتىندە قازاق ەلىنىڭ دوسى ءارى ءبىر باۋىرى وتىر دەپ ەسەپتەڭىز. بۇل شىن نيەتتەن ايتقان ءسوزىم. ءبىز قازىر ەكى ەل شىعارمىز، ءبىراق - ءتۇبى ءبىر ۇلتپىز. تۇركيادا ابايدى تانىستىرۋ جۇمىستارى ءجۇرىپ، تۇرىك حالقى قازاق اقىنىن جاقىن تانىدى. دەگەنمەن، اباي تانۋ ءوز جالعاسىن تابۋى ءتيىس. بيىل - تاۋەلسىزدىكتىڭ وتىز جىلدىق مەرەيتويى. دەمەك بىزدەر اتقاراتىن شارۋا اۋقىمدى. ءوز باسىم باۋىرلاردىڭ ىنتىماعى ارتا ءتۇسۋى ءۇشىن قىزمەت ەتۋدەن جالىقپايمىن»، - دەدى پارلامەنت دەپۋتاتى مەتين گۇندوعدۇ.


«20 جىلدان بەرى قازاقستانعا قاتىستى بارلىق دۇنيەلەردى ۇزبەي وقىپ ءجۇرمىن. تۇران جەرى - ءبىزدىڭ اتاجۇرتىمىز. قازاق تاريحى - ءبىزدىڭ دە تاريحىمىزدىڭ ءبىر بولشەگى. ارينە مۇنى سالماقتى شارالاردا ءتۇسىندىرۋ قاجەت. ەلىمىزدىڭ تۇكپىر- تۇكپىرىن ارالاپ، ءتۇسىندىرۋ جۇمىستارىنا اتسالىستىم. اباي جانە ءال-فارابي مۇراسىڭ تەك قازاقتىڭ عانا ەمەس، كۇللى تۇركى الەمىنىڭ ورتاق بايلىعى جانە سول مۇرانى ناسيحاتتاۋ جولىندا ەڭبەك ەتەمىز»، - دەدى ساياساتتانۋشى، عالىم كۇرشات زورلۋ.



سوڭعى جاڭالىقتار