ەلىمىزدەگى جارنالامالاردا مەملەكەتتىك تىلدەگى ءماتىن مىندەتتى بولادى

نۇر-سۇلتان. قازاقپارات - قازاقستاندا ىلىنگەن جارنامالاردا مەملەكەتتىك تىلدەگى ءماتىن مىندەتتى بولۋى كەرەك.

وسى ورايدا باننەرلەر، ماڭدايشالار، حابارلاندىرۋلار، جارناما، باعا كورسەتكىشتەرىنە قاتىستى وسىنداي تالاپ ەنگىزىلەدى، دەپ حابارلايدى قازاقپارات ءتىلشىسى.

ايتا كەتەيىك، بۇگىن پارامەنت ءماجىلىسىنىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كورنەكى اقپارات ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا ماقۇلداندى. زاڭ جوباسى بويىنشا بايانداما جاساعان ق ر مادەنيەت جانە سپورت ءمينيسترى اقتوتى رايىمقۇلوۆا كورنەكى اقپارات قۇرالدارى (باننەرلەر، ماڭدايشالار، حابارلاندىرۋلار، جارناما، باعا كورسەتكىشتەرى جانە ت. ب. ) ەلدەگى قوعامدىق- ساياسي، الەۋمەتتىك- ەكونوميكالىق جاعدايعا اسەر ەتەتىن ماڭىزدى قۇرالدار بولىپ سانالاتىنىن ايتتى.

دەرەكتەمەلەر مەن كورنەكى اقپارات ماتىندەرىن ورفوگرافيا نورمالارىنا سايكەس جازۋ تالابى قازاق تىلىندەگى ماتىندەردىڭ ساپاسىز جازىلۋىنا، ورفوگرافيالىق قاتەلەرگە جول بەرمەۋگە باعىتتالعان.

«قۇجاتتى بەكىتۋدەن كۇتىلەتىن ناتيجەگە توقتالساق، مەملەكەتتىك ءتىلدىڭ كورنەكى اقپاراتتا مىندەتتى تۇردە قولدانىلۋىن قامتاماسىز ەتۋ، دەرەكتەمەلەر مەن كورنەكى اقپارات ماتىندەرىن ورفوگرافيا نورمالارىنا سايكەس جازۋدى قامتاماسىز ەتۋ، ماتىندەردىڭ ەكى تىلدە تەڭتۇپنۇسقالىلىعىن ساقتاپ جازۋدى قامتاماسىز ەتۋ. زاڭ جوباسىن قابىلداۋ ەلىمىزدەگى ءتىل ساياساتىن ءتيىمدى ىسكە اسىرۋعا ىقپال ەتەتىن بولادى، تەرىس قۇقىقتىق جانە الەۋمەتتىك- ەكونوميكالىق سالدارعا اكەپ سوقتىرمايدى»، - دەدى ا. رايىمقۇلوۆا.

ونىڭ ايتۋىنشا، كورنەكى اقپاراتتى اشىق كەڭىستىكتە جانە عيماراتتار ىشىندە زاڭنامادا بەلگىلەنگەن تارتىپپەن مەملەكەتتىك ورگاندارمەن قاتار كەز كەلگەن كاسىپكەرلىك سۋبەكتىلەرى جۇزەگە اسىرا الادى. كاسىپكەرلىك سۋبەكتىلەرى كورنەكى اقپاراتتى ءوز ءونىمى مەن قىزمەتىن ىلگەرىلەتۋ قۇرالى رەتىندە پايدالانادى.

«مەملەكەتتىك ورگاندارعا ازاماتتاردان كورنەكى اقپاراتتى ورنالاستىرۋ كەزىندە ءتىل تۋرالى زاڭناما تالاپتارىنىڭ بۇزىلۋىنا بايلانىستى شاعىمداردىڭ كوپتەپ ءتۇسۋى ورىن الۋدا. وسى ورايدا مەملەكەتتىك تىلدەگى كورنەكى اقپاراتتىڭ بولماۋىن ازاماتتار قازاقستان رەسپۋبليكاسى كونستيتۋتسياسىنىڭ 14-بابىندا بەكىتىلگەن ءوز قۇقىقتارىنا قىسىم جاساۋ دەپ سانايدى»، - دەدى مينيستر.

اۆتور: رۋسلان عابباسوۆ